Portada Educación IX pide instrucciones clares na implementación de la LOMLOE

IX pide instrucciones clares na implementación de la LOMLOE

by redacción asturnews

La vocera d’IX nel Parlamentu d’Asturies, Ángela Vallina, reclamó güei “instrucciones clares” pa la implementación de la reforma de la llei educativa (LOMLOE), y atender a les reclamaciones de les centrales sindicales sobro’l cronograma.

La diputada, esclarió qu’IX sofita la reforma, al entender que supón una meyora na educación polo xeneral y nel modelu educativu públicu, magar, tien duldes sobro cómo se ta desenvolviendo l’aplicación del mesmu. Pa Vallina, la Conseyería impunxo unos plazos que nun fueron consensuaos cola representación llegal del profesoráu, xenerándose grandes tensiones nos centros por cuenta de la gran carga de trabayu burocráticu que supón ellaborar de cero les nueves programaciones ensin nengún tipu d’ayuda per parte de l’autoridá educativa.

“Señora Conseyera, tolos sindicatos tán esixéndo-y la paralización de los plazos qu’enllantó unilateralmente pa la entrega de los proyectos curriculares y programaciones, según una formación calidable que sustituya al actual cursu promovíu pola so Conseyería, nomáu por numberosos docentes como una auténtica perda de tiempu”. Nesti contestu, IX plantegó la revisión del calendariu d’aplicación pa llograr unos plazos razonables, y formación pal profesoráu que sía “clara y útil y, poques gracies, pídese-y qu’amenorgue la carga burocrática de les y los profesores qu’enzanca y, en dellos casos, torga, el llabor docente”.

L’oxetivu, concluyó Vallina tien de ser “garantizar que una llei na que tamos d’alcuerdu, una llei llamada a ameyorar sustancialmente el nuesu sistema educativu aplíquese cuntando cola participación de les y los docentes que son, xuntu col restu del sector educativu, los que tienen que garantizar la so implantación y bon funcionamientu. Pído-y, por favor, que faiga casu.”

Tamién te podria gustar