IX alvierte de que’l pactu Ciudadanos-PP escaez les demandes de la comunidá educativa

Enrique Díez, coordinador de l’Área Federal d’Educación d’IX, denunciaba esti día que de salir alantre l’alcuerdu a partir de la investidura que plantega Mariano Rajoy dará nales a la contrarreforma educativa, “que va facilitar que s’apliquen inclusive les polémiques reválides”.

El mentáu pactu explicita que se va conxelar el calendariu de implementación “en toos aquellos aspeutos que nun entraren a valir”. Esto ye, va caltener el 100% de la LOMCE, porque tol so conteníu entró yá a valir. El decretu que regula les reválides ta vixente dende’l 31 de xunetu, anque éstes celébrense a final de cursu. Amás, ampliar la LOMCE a 2º y 4º de la ESO y a 2º de Bachilleratu va aplicase yá nuna selmana,  cuando empiece’l cursu. Izquierda Xunida, al traviés de la so Área Federal d’Educación, alvierte de que’l pactu alcanzáu ente Ciudadanos y el PP, tien un conteníu que centra bona parte de les propuestes que Mariano Rajoy trata de sacar alantre na sesión de investidura empecipiada esta tarde, “en sirvir pa encontiar la contrarreforma educativa que supón la LOMCE en contra de les demandes de la comunidá educativa”.

El coordinador de l’Área d’Educación d’IX denuncia que “entienden que formar persones ye equivalente a producir torniellos, como si pudieren midise les sos resultancies d’una forma contable administrativamente, ensin tener en cuenta los numberosos factores que los afecten y les visiones tan distintes sobre lo que se consideren ‘resultancies afayadices’ nel procesu de formación educativa n’infantil, educación obligatoria, postobligatoria o universitaria”.

Planteguen un Estatutu del Personal Docente’, basáu nel Llibru Blanco de la Función Docente’. Esto ye, basen la so propuesta nun llibru blancu ellaboráu ya impuestu pol PP, ensin cuntar cola participación de los mesmos interesaos, el profesoráu y los sos representantes sindicales, y a favor de los corporativos colexos profesionales. Amás, llueñe de regular les normes correspondientes al so trabayu, con un imprescindible amenorgamientu de les actuales ratios, grupos y hores de clase, pa consiguir una docencia calidable, lo que proponen ye un modelu de desenvolvimientu profesional vertical y una dirección técnica na qu’amiesten el sueldu a les resultancies de los centros y al desempeñu del alumnáu.

Del conteníu d’esti pactu “contra la comunidá educativa” pueden criticase tamién cuestiones como que l’aumentu del númberu de places n’escueles infantiles nun sía na escuela pública, o que se siga “impulsando la FP Dual”, que nun dio resultancia nel nuesu país col actual texíu empresarial y que n’Alemaña ta en franca retirada.

“Pero, sobremanera, nada diz esti pactu de comprometese a alzar el presupuestu d’educación que’l PP dexó nun 4%, hasta algamar la media europea d’un 6,2% del PIB y tender escontra’l 7,5% de los países del norte d’Europa, qu’amuesen con fechos que realmente se creen les sos declaraciones de que la educación y l’universidá ye’l futuru d’un país”, conclúi’l dirixente d’Izquierda Xunida.