Iniciativa pol Asturianu esixe soluciones pa evitar el pieslle de los Servicios de Normalización Llingüística

La falta de compromisu de los conceyos y la inesistencia d’un conveniu cola Direición Xeneral de Política Llingüística, que dexa en situación de total indefensión a los trabayadores, llevó al pieslle de trés Servicios de Normalización Llingüística –Llaviana, Corvera y Mancomunidá Ozcos-Eo- a los qu’hai que sumar el casu del SNL peslláu n’agostu y a los continuos parones nestos servicios dende’l so nacimientu, según denuncien dende Iniciativa pol Asturianu, que s’opón “al retrocesu que supón dexar ensin normalización a los conceyos nos que trabayen estos servicios y la consiguiente perda de puestos de trabayu que remanez d’ello”.

Los Servicios de Normalización Llingüística (SNL) son los departamentos que desendolquen el trabayu téunicu de cara a avanzar nun consensuáu procesu de normalización del idioma asturianu y del eonaviegu. Un trabayu que califiquen de “necesariu, xustu ya ilusionante” de fomentu del asturianu y del eonaviegu “nun nivel de contautu más direutu cola ciudadanía”.

Pa Iniciativa pol Asturianu, la Direición Xeneral de Política Llingüística “tien la obligación y la responsabilidá de cumplir cola normalización llingüística, calteniendo estos servicios, afalando a los conceyos a la estabilidá de los mesmos y faciendo que la Rede llegue al 100% de la población asturiana, ampliando esta rede a los llugares a los qu’agora nun llega”.

Dende Iniciativa pol Asturianu piden tamién, al igual que los trabayadores, “da-y personalidá xurídica propia a la Rede de Normalización Llingüística nos Conceyos”, dalgo que, espliquen “facilitaría la coordinación y qu’anguaño esiste únicamente pola voluntá de los téunicos”.