Iniciativa pol Asturianu celebra como un ésitu la so propuesta de xurar el cargu n’asturianu en más de venti conceyos

Iniciativa pol Asturianu celebra como un ésitu’l fechu de que polo menos en venti de los conceyos que se constituin esti sábadu, dellos conceyales emplegaran l’asturianu o gallego-asturianu na so promesa o xura del cagu. Iniciativa organizó estos díes una campaña na que facía un llamáu a conceyales y alcaldes pa usar l’asturianu o’l gallego-asturianu na so zona, nel so xuramentu o promesa que facíen el sábadu nos 78 conceyos d’Asturies.

Nuna nota qu’espardió l’Asociación el mesmu domingu, describía que “no que cinca a los conceyos de les grandes ciudaes del centru d’Asturies, hebo representantes que xuraron o prometieron n’asturianu en Xixón, Avilés y Uviéu, con conceyales del PSOE, Foro, Izquierda Xunida y les formaciones venceyaes a Podemos”.

Amás, xuraron cargu n’asturianu o gallego-asturiano en Villaviciosa, Carreño, Llanera, Siero, Noreña, Mieres, Llangréu, Llaviana, Ribeseya, Cangues d’Onís, Peñamellera Alta, L.lena, Uviéu, La Ribera, Sobrescobiu, Pravia, Bimenes ya Ibias.

Dende Iniciativa pol Asturianu valoren “de forma mui positiva que l’usu del asturianu fuere tresversal y qu’usaren l’asturianu, como patrimoniu que ye de toos, formaciones de tou tipu: PSOE, les candidatures de Podemos (como Xixón sí puede, Somos Llangréu, Nós Ibias, Somos Siero, etc.) Foro, Izquierda Xunida, Partíu Asturianista, IAS, Conceyu Abiertu por Noreña, asina como otres formaciones llocales”.

Esti xestu, dicen n’Asocaición, “tien d’acompañase dende’l primer día con midíes ya iniciatives empobinaes a meyorar la situación del asturianu nel ámbitu de los conceyos, onde ye necesario usar l’asturianu, recuperar y oficializar la toponimia tradicional, aprobar ordenances de normalización o poneles en marcha ellí onde yá esisten, da-yos un meyor usu y estabilidá a los servicios de normalización llingüística y facer polítiques tresversales que-y dean presencia al asturianu en tolos ámbitos de la xestión de los conceyos”.

Dende Iniciativa pol Asturianu ufren tamién el so “asesoramientu a partir d’esti momentu y animamos a tolos conceyales y alcaldes interesaos en dar pasos a favor de la normalización a ponese en contautu con nós nel nuesu corréu contautu@iniciativapolasturianu.org o bien nes redes sociales de la organización en Facebook y Twitter. Nós vamos trabayar por ponenos poner en marcha alcuerdos y trabayar por llevar a los conceyos unes polítiques de normalización que favorezan una meyor situación pal asturianu nes alministraciones más cercanes a la xente”.

Pa Iniciativa, “nun basta col usu simbólicu del asturianu, sinón qu’ha trabayase por meyorar los drechos civiles de los ciudadanos y la normalización del idioma n’Asturies. Munchos conceyales pudieron ver güei en primer persona como-yos punxeron problemes pa facer una cosa tan cenciella como xurar el so cargu en llingua asturiana, como nos informaron delles formaciones”.

Los testos de xuramentu que lleeron (con diferentes versiones) los conceyales que decidieron facelo n’asturianu foron como’l que vien darréu: “Xuro, pola mio conciencia y honor, cumplir con fidelidá les obligaciones del cargu de conceyal con llealtá al Rei, y curiar y facer curiar la Constitución como Norma Fundamental del Estáu”.