Iniciativa considera “mala noticia pal idioma” la renovación de Virgili na RTPA

El pautu ente PSOE, PP ya IX que vieno acabante d’anunciase alredor de l’anovación de la dirección de la RTPA pol qu’Antonio Virgili, confírmase na dirección xeneral, un cargu nel que lleva en funciones dende 2011 “nun ye una bona noticia pa la llingua asturiana”, sigún Iniciativa pol Asturianu.

“Una radiotelevisión asturiana tien sentíu siempres que seya una ferramienta vertebradora de la sociedá, divulgadora de la so realidá y normalizadora de les llingües d’Asturies. Lo contrario ye un marafundiu de perres inesplicable cuando cuntamos con una canal pública en castellán con desconexones p’Asturies, y con decenes de canales privaes”, espliquen dende Iniciativa pol Asturianu.

Pa la organización “el señor Virgili nun paez pol llabor de que la RTPA seya una ferramienta positiva pal asturianu. Nos años que lleva al frente de la mesma nun pudo sentise nin un minutu d’informativos televisaos n’asturianu, malapenes pudimos ver dos o trés películesdoblaes y los programes n’asturianu que s’emitieron tuvieron un claru elementu diglósicu na mayor parte los casos. L’asturianu quedó fuera de los espacios clave pa la prestixación d’un idioma y pa la tresmisión xeneracional del mesmu”.

L’alcuerdu nun da anuncia d’un bon futuru pa la presencia del asturianu na nuesa radiotelevisión. Pa Iniciativa pol Asturianu y no que cinca al usu del asturianu esta decisión ye “Más de lo mesmo na RTPA”.