Ígor Medio y Lisardo Prieto estampen el so primer discu embaxo’l nome de Dual

Ígor Medio y Lisardo Prieto, dos conocíos músicos de la escena folk asturiana, acaben d’estampar el so primer trabayu discográficu embaxo’l nome de Dual. Los dos instrumentistes xuntáronse va más de cinco años en Xixón y dende entós fueron elaborando un repertoriu propiu del qu’esti CD, tituláu como’l duu de vigulín y bouzouki, recueye doce temes.

El discu, editáu embaxo’l sellu Fonoastur y producíu por Lisardo Lombardía, presentóse esta selmana n’Uviéu y el prósimu día 22 va facelo en Xixón nun conciertu nel Antigu Institutu Xovellanos. “Dual” recueye doce temes: cinco instrumentales y siete cantaos poles voces de Medio y Prieto.