Hector Braga punxo banda sonora al Certame de Cabrales

El Parque d’Arenas de Cabrales foi esti sábadu l’escenariu del III Festival Picos d’Europa, que sirve d’entamu musical al Certame del Quesu Cabrales que se desenvolvió a lo llargo del domingu. La presencia del recién ganador del Troféu MacCrimmon en Lorient, el gaiteru Álvaro Álvarez, y d’Héctor Braga que tuvo tamién presente na mañana del domingu nel Certame queseru foron les estrelles d’un cartel vien curiosu.

Esti sábadu, al aportar la medianuechi, el III Festival Picos d’Europa tuvo como protagonista cimeru al músicu y compositor llangreanu Héctor Braga, faciendo la presentación de dellos de los temes musicales que van componer el so esperáu discu “La fonda de Lola”. Un total de trelce composiciones de fusión ente soníos asturianos, flamencos y llatinoamericanos. Y un discu pal que collaboraron reconocíos maestros del soníu folk más tradicional como Luis Delgado (percusiones), Kepa Junkera (trikititxa), Ángel Ruiz (banjo), Orestes Barbachán (percusión llatina), la OQUES (Orquesta de Cámara de Siero) y la Banda de Gaites Picos d’Europa-DOP-Cabrales amás del so propiu grupu La Bandina´l Bache.

Héctor Braga ye bien nomáu nel panorama musical asturianu por trabayos como “Caminos del Mundu”, “Trad. Ye” y “Encomplando” y participaciones como les del nel nuevu discu folk-rock de Stormy Mondays o l’acompañamientu y producción nel discu “Agora” d’Anabel Santiago con quien tien una llarga llista de collaboraciones y actuaciones. Premiu AMES como “Meyor instrumentista”, Héctor ye musicólogu y etnomusicólogo, amás de máster en Comunicación y doctorandu na Universidá d’Uviéu preparando la so tesis sobre l’asturianada.

Esti músicu llangreanu tien amás el mayor archivu dixital de música tradicional asturiana con más de 600 pieces qu’atopó per archivos públicos y privaos, a lo llargo de cásique cinco años.

Nesti III Festival Picos d’Europa rindiose homenaxe a los Hermanos Galán y a los gaiteros cabraliegos Pedro Niembro “El ciegu Pandiellu” y Anselmo Lobeto “Anselmo de Camarmeña”. El programa completábenlu la Banda de gaites Ciudad de Cangues d’Onís, Marta Elola (del coleutivu Muyeres) con cantares y pandereta, la Xiranda de Cualloto, la Bandade Picos d’Europa-DOP Cabrales y el gaiteru Álvaro Álvarez, que vien de ganar per segundu añu consecutivu’l McCrimmon nel Festival de Lorient, como carta de presentación sobrada de la so calidá y veteranía musical, pese a la so mocedá.