Gonzali Producciones entama la so actividá con un documental sobre buscadores d’ayalgues

“L’últimu chalgueiru” ye’l títulu d’un documental que ta acabando de rematase nestos díes y que según anunció Gonzali Producciones “va asoleyase a nun a tardar”. Ye un productu d’una hora de duración que cuenta la historia de los buscadores d’ayalgues, tema mui recurrente nes lleendes asturianes. T

Testigos d’estes busques cuenten la so esperiencia, n’especial Emilio Fernández Cuervo, vecín de Sotu’l Barcu que dedicó gran parte de la so vida al llabor de chalgueiru, nome col que se conoz nel occidente del país a les persones que tán a la gueta d’ayalgues, y al que se-y dedica esti trabayu audiovisual que s’estrenare na xornada inaugural de l’Arribada 2009, el 18 setiembre del añu pasáu.

L’últimu chalgueiru ye un documental dirixíu por Alberto Álvarez Peña ya Illán Gonzali, rodáu per delles llocalizaciones d’Asturies, polo qu’amuesa “una gran cantidá de rexistros propios del patrimoniu llingüísticu asturianu”. Participaron nel rodaxe, colos sos testimonios, amás d’Emilio Fernández Cuervo, Mª. Cruz Arenas, Pepe Veiga, Julián Menéndez García, José María Álvarez, Rogelio Álvarez Fernández, Amparo Pardo Rodríguez, Secundino González Suárez, Celestina Riesgo Castro, Lolu del Revel.lón, Alicia Rodríguez Pérez, José Antonio Lozano, Gabino María García, Abel Jardón Méndez, Jovino Iglesias, José Suárez Fernández y Arturo González Fernández.