Gabino de Lorenzo refuga dir al Congresu y va centrase na política uviedina

Preséntose como cabeza de llista del PP por Asturies nes elecciones del domingu pasáu y fizo un apueste por superar al PSOE n’Asturies. Dempués de perder per primer vegada dende 1996 les elecciones xenerales el PP n’Asturies, Gabino de Lorenzo, ta acabante de refugar con una carta al presidente del so partíu, Ovidio Sánchez, el so acta de diputáu al Congresu.

Pa De Lorenzo “El mensaxe democráticu de bona parte de la sociedá asturiana ye claru. Poro, enfótome dende agora esclusivamente na alcaldía d’Uviéu”. Asina mesma, Gabino de Lorenzo agradeció a Sánchez y a tol PP “l’apoyu dau”. Asume asina De Lorenzo la responsabilidá de los malos resultaos del PP n’Asturies.

Paecen remates equí les espectatives qu’apuntaben dende dalgunos sectores y que poníen a Gabino de Lorenzo como próximu candidatu a les elecciones autonómiques asturianes. Un movimientu internu del partíu que yá entamaba a recibir el nome de “sector de la boína” y qu’a la espera del congresu de los populares asturianos, queda a la espera.

Con esti refugu al acta, la candidata númberu 5 del Partíu Popular, Carmen Maniega, pasa a ocupar l’escañu que-y correspuende a Gabino de Lorenzo.