Flor d’Augua va lleva güei los sos sones al Tierra Astur de Cualloto

Redacción.

Güei xueves y dientros del ciclu de conciertos de música folk qu’ufierta la sidrería Tierra Astur de Cualloto va poder disfrutase de l’actuación de ‘La Flor d’Augua’, un dúu formáu por dos hermanes, Aurora y Maite Pazos, que nel añu 2006 sacó’l so primer discu ‘Na tsariega’.

El discu taba producíu pol gaiteru Xuacu Amieva y ye que les dos hermanes de Zarreu formen parte d’un grupu de baille nel que conocieron a Amieva, pal que faen coros nos sos conciertos. En ‘Na tsariega’ les hermanes Pazos amuesen el folclore de Degaña con una escoyeta de lo que más-yos gustaba y nel conciertu van poder enseñar el poder de les sos voces y la gracia de los sos toques de pandereta.

Con ‘Flor d’Augua’ van tar dos pareyes de baille y dos gaiteros de la zona: Aitor García y David y van poder sentise los cantares del so discu y dalgún nuevu.