Fernández-Osorio presenta “Tayu” n’Uviéu

Esti xueves a les 19:00 hores, na Biblioteca d’Asturies d’El Fontán, Alejandro Fernández-Osorio va presentar el poemariu Tayu, una propuesta poética que s’aparta de la presentación tradicional p’averase al monólogu dramáticu y qu’algamó esti añu’l Premiu Xuan María Acebal de poesía n’asturianu.

La temática central del poemariu ye la reflexón monologada del autor na que destaca «cómo la voz d’un nietu revisita les vivencies de la mina con una visión social y política, pero al empar íntima y novedosa, de quien se siente heriede d’una tradición que pesa nel entornu familiar, pero qu’en realidá yá nun existe pa quien escribe dende otraesperiencia, la de la emigración».

Alejandro Fernández-Osorio, que naciera en Vil.layana, L.lena, en 1984, ye psicólogu y escritor y tien espublizaos llibros de poemes como ‘Frontería’ (2011) y ‘Magaya’ (2015), amás de la novela ‘JC’ (2016), obres coles qu’algamara los premios Asturies Xoven de poesía y narrativa, y el premiu de la Crítica d’Asturies de poesía n’asturianu.