Félix Fernández de Castro va volver a intentar sacar a la llingua asturiana de los estudios universitarios

El profesor de la Facultá de Filoloxía ta acabante mandar una carta a los compañeros na qu’anuncia la so intención de presentar una nueva propuesta na Xunta de Facultá, cola que quier sacar a la llingua asturiana definitivamente y dafechu de los estudios reglaos. Fernández de Castro ye conocíu pola so primer enmienda, que consiguió echar p’atrás la propuesta de la entós decana de la filoloxía, Ana Mª Cano.

Los esfuercios del decanu en funciones actual, José Antonio Martínez, pa meter al asturianu nel sistema d’estudios européu al traviés d’un minor, “que pudiere axuntar más votos que la propuesta anterior” puen vese torgaos si la propuesta del profesor Fernández de Castro trunfa.

Según la carta unviada pol profesor la enmienda que va presentar, ha facese con votación secreta, pa que “cada miembru de la Xunta esprese la so preferencia respectu a la presencia o non d’un ‘Minor’ d’Asturianu nel futuru catálogu de la Facultá, y lo faiga escoyendo ente les dos opciones siguientes: Opción A: Mantenimientu del ‘Minor’ n’Asturianu’; Opción B: Esclusión del ‘Minor’ n’Asturianu”.

La xustificación que da Fernánde de Castro na so carta ye “la dulda de qu’esista una demanda social del asturianu”, entrugándose “quién evaluó esa demanda social. Yo, polo menos, nun creo qu’esista cosa tala. Invóquense les peticiones d’un Conseyeru Rexonal, relatives a les necesidaes de la enseñanza secundaria. Agora bien, ye conocío qu’estos díes el Gobiernu Rexonal vese obligáu estos díes a negociar un pactu con una formación minoritaria qu’esixe xestos pa col asturianu. ¿Acasu va determinar una coyuntura meramente parllamentaria lo que diseñamos na Facultá?”, diz.

Esa demanda social, según Félix Fernández de Castro, ta reducida “a una constelación de pequeños grupos, anque con gran proyección mediática”. Según el profesor “en xunu, 34 miembros de la Facultá de Filoloxía votamos contra la titulación, y 15 persones encerraes 4 díes xunto al despachu del Rector pa protestar por ello. ¿Quién acabó mereciendo más atención, dende’l puntu de vista institucional?”.

Según el profesor, nun s’opone a “a la docencia venceyada a la investigación científica” pero camienta que la que se manda dende’l Decanatu “ye más bien una propuesta normativa, reguladora, destinada a construyir una realidá que dalgunos, mui pocos, deseen. Toi convencíu de qu’esti proyectu del nuesu equipu decanal busca sobre too favorecer lo primero [la investigación científica de la llingua asturiana]; pero llega a nós sofitándose nuna solicitú, d’orixe pretendidamente “social”, que prefigura la so deriva p’hacia lo segundo”.

La razón del votu secretu ye pal profesor “la única forma segura de falar, ensin esponenos al insultu, l’amenaza, o dalgo peor”.

La situación ponse dificil pal asturianu na Facultá, a pesar de la voluntá amosada pol decanu y el rector Vicente Gotor de que l’asturianu tea nos planes de la Universidá d’Uviéu.