Excena Xixón estrena “Morrer de selfie”

Esti vienres 28 d’ochobre, Excena Xixón estrena “Morrer de selfie”, un espectáculu unipersonal que surfea reflexivamente la verdadera fiebre narcisista qu’afara la nuesa sociedá, el gafíu mundu d’egos qu’escome la nuesa política y condérganos al esmolecedor xuegu del “selfie mortal”. Un testu valiente que dispara ensin mieu al centru del nuesu ombliguismu nel Centru Municipal Integráu El Cotu.

Con ustedes, Carlos Fajardo. Unu de los nuesos, unu de los vuesos. Unu más de la familia, unu más. Esta tarde tien la palabra na asamblea estraordinaria. Y va falar. Vaiga si va falar. Ocupen los sos asientos. La función va empezar. Dirección Maxi Rodríguez

¿Vivimos para posar o posamos para vivir? Pa Carlos la política ye daqué sobreveníu. Xuna cuestión azarosa, él va onde van los sos amigos. Carlos ye un tipu lleal, noble, bonachón. Siquier esa yera la so esencia hasta que’l bon home empezó a tocar poder. El poder desinhibe, qué-y vamos a faer, alteria la nuesa percepción de la realidá, fainos perder l’equilibriu, sentinos superhéroes y, lo que ye peor, ¡fotoxénicos!

Hasta equí lleguemos.
Encantaos de conocenos.
Asina de inanes y embaecíos, sí, vaiga, sentar.
Daquién tenía que dicilo.
Maxi Rodríguez.

Centru Municipal Integráu El Cotu, Xixón
28 d’ochobre de 2022 a les 19:30