El Centru d’Interpretación La Carriona conmemora Tolos Santos con conciertos y esposiciones

Hasta’l 1 de payares y coincidiendo col so décimu aniversariu, el Centru d’Interpretación del Campusantu de La Carriona conmemora Tolos Santos con conciertos, esposiciones y visites. El monumentu n’alcordanza de les víctimes de la guerra civil y el franquismu “La llosa del tiempu” foi designáu como meyor escultura de los campusantos español por revistir “Adiós Cultural”.

Na víspora de Tolos Santos el CICLAC, Centru d’Interpretación del Campusantu de La Carriona, cumple’l so décimu aniversariu. En conmemoración d’esta efeméride, y de la festividá n’alcordanza de los difuntos, preparó un completu programa d’actividaes qu’inclúi conciertos, visites empuestes y esposiciones, hasta’l 1 de payares.

Empiecen esti vienres, 28 d’ochobre y, amás de los percorríos empuestos, tantu diurnos como nocherniegos, va haber recitales de la Banda de Música d’Avilés, dirixida por Xuacu Llaneza y del Alumnáu de Coru de les Enseñances Profesionales del Conservatorio Julián Orbón”, so la dirección d’Isabel Baigorri. Dambes actuaciones van tener llugar na redolada de la capiya del campusantu.

Coincide, amás, cola designación de “La Llosa del Tiempu”, monumentu n’alcordanza de les víctimes de la Guerra Civil y el franquismu, como meyor escultura de los campusantos españoles, distinción otorgada por revistir “Adiós Cultural”. Quedó per delantre de les de los campusantos de Reus (Tarragona) y Villanueva del Rosario. L’actu d’entrega del galardón va tener llugar en Madrid el próximu 22 de payares.

Con esti premiu, La Carriona conviértese nunu de los campusantos del país con mayor númberu de reconocencies pol so patrimoniu y la so actividá cultural, amás de ratificar la so pertenencia a la Ruta Europea de Campusantos Significativos. En 2015, el panteón de el marqueses de San Juan de Nieva llogró’l primer premiu en meyor monumentu, y la cortil al completu, tercer meyor campusantu español. Dos años dempués tamién un tercer puestu como “Meyor actividá de puertes abiertes”.

Coles mesmes, la Llosa va poder ser contemplada col llume nocherniego instalada na cortil de recogimiento y reflexón en que s’alluga: les antigües dependencies de la güesera.

Más información