Eva González torna a les llibreríes con “Pequena enciclopedia de nós”

El Club Xeitu, asociación venceyada a la montaña suroccidental asturlleonesa acaba d’espublizar un volume de más de doscientes páxines tituláu “Pequena enciclopedia de nós”, de l’autora lleonesa, yá finada, Eva González. La edición ta al cargu del so fíu, Roberto González-Quevedo y la so ñeta Irma González-Quevedo Pedrayes, qu’arrecoyeron los sos escritos filolóxicos y culturales: vocabularios, reflaneiru, cusil.linas, escritos etnográficos y cantares, redactaos ente 1980 y 1985. Queda, asina, pendiente de publicar la so obra namás “Hestoria de mia vida”, a mou de biografía.

El llibru ábrese con un llistáu de nomes n’asturianu, na variedá pal.lueza, darréu un vocabulariu xeneral d’unes cien páxines, onde l’autora da la correspondencia col castellán. A esti llistáu súmense otros más pequeños d’estremaos temes: plantes melicinales, animales domésticos, oficios, páxaros…

El llibru fina con refranes, espresiones y frases feches y dos apartaos etnográficos, unu dedicáu a tradiciones y vezos del pueblu, y otru a cantares. En conxuntu, una verdadera “pequena enciclopedia” de la cultura asturlleonesa, de los pal.luezos.

De la escritora Eva González Fernández (Palacios del Sil, 1918-2007) quedaron munches obres escrites y espublizaes a la so muerte, destacando les de la serie Na Nuesa Tsingua (axuntaes na publicación Poesías ya cuentus na nuesa tsingua, 2007) ya Cuentos completos (2008), onde se compilaron les narraciones y cuentos.