Espublicen un númberu más de la revista Lletres Asturianes

L’Academia de la Llingua Asturiana ta acabante asoleyar el númberu 102 del so boletín, correspondiente al mes de febreru de 2010. La obra ábrese con un entamu nel que l’ALLA valora como “un llogru importante” los nuevos estudios oficiales d’asturianu en Maxisteriu y Filoloxía, anque recuerden la necesidá de que’l Gobiernu d’Asturies tien que reconocer “la profesión de maestru de llingua asturiana”. La revista cunta amás coles estayes habituales, que s’abren col trabayu “Llectura dialeutal de Cantabria”, de Xosé Lluis García Arias.

Los estudios siguen con “Áreas léxicas en el dominio astur-leonés: algunos nombres vernáculos de árboles y sus frutos, plantas herbáceas y flores”, de Janicl Le Men Loyer o “Viervo por vierbo: les inxerciones documentales y los sos problemes filolóxicos (un exemplu asturianu de 1295)”, por Clara E. Prieto Entrialgo.

Bien interesante ye l’“Estudiu sobro l’emplegu del DALLA on-line. Un averamientu sociollingüísticu”, nel que Xosé Antón González Riaño, Xabiel García Pañeda y David Melendi Palacio estudien les consultes al diccionariu de l’ALLA na rede, incluyendo un llistáu de les 100 pallabres más buscaes, y un estudiu de los resultaos atopaos polos usuarios del serviciu, que ficieron más de 154.700 consultes.

José Antonio Longo Marina sigue con “Les tierres ensin documentos son tierres con historia. O cómo mandándonos de la toponimia somos quien a reconstruyir la biografía d’un pueblu” y Margarita Torre Sevilla inclúi nesti númberu “Monarquía y nobleza: las transformaciones en el territorio leonés en los siglos X y XI a través del estudio del parentesco”.

Esti Lletres inclúi amás “El Derechu del Reinu de Lleón nel sieglu XIII: fontes, lliteratura xurídica y llingua”, por Nicolás Bartolomé Pérez, “L’analís del drechu políticu nel Fueru Xulgu afita una tapecida tesis de la Ilustración asturiana: la de la independencia política d’Asturies na Edá Media”, de Xurde Blanco Puente, y ýa dientro de la estaya “Lletres Vieyes”, la reproducción d’“Al artista genial Don Ramón Duarte con devoción y cariño de «Marcos del Torniello»”, por A. Parrales Rodríguez.

Como siempres Lletres Asturianes inclúi na parte final espaciu p’anuncies, reseñes y repás a la bibliografía n’asturianu espublizada apocayá.