Ennio Morricone va estrenar nuevu discu n’ochobre

El compositor y director italianu ganador d’un Oscar, Ennio Morricone, va estrenar nuevu discu, ‘Morricone 60’, el 7 d’ochobre pol so 88 cumpleaños y n’honor a los sos 60 años de carrera, según informa la discográfica cola que robló’l contratu, Decca Records.

La compañía esplica que Morricone decidió editar un nuevu álbum, dempués de 600 composiciones, pa que los sos fans puedan “esfrutar” del so legáu. Nel discu, atópense distintes obres como la música que compunxo pa “El bonu, el feu y el malu,” o pa la galardonada película de Quentin Tarantino “Los odiosos ocho”. Amás, l’álbum va cuntar con nueves melodíes compuestes cola Orquesta Sinfónica Nacional Checa, cola que collaboró en numberoses películes.

Per otru llau, la directora de la discográfica, Rebecca Allen, considera un honor” cuntar con Morricote, y definiólu como un iconu qu’inspiró a munchos artistes”. Amás, esti álbum coincide cola xira ’60 años del Tour Mundial de la Música’, en que va dar la vuelta al mundu con 200 músicos y cantantes nel escenariu.

El compositor italianu escribió más de 500 adaptaciones musicales pa cine y televisión y ye unu de los únicos compositores de cine que consiguió un premiu de l’Academia de Cine polos sos llogros. Ente les sos composiciones, destaquen delles para Hasta que llegó la so hora, Érase una vegada n’América, Por un puñáu de dólares, Los intocables y La misión.