Empieza’l III Taller d’Iniciación al Monologuismu Cómicu Asturianu de Candás

Dientro del marcu del XVI Salón de Teatru Costumista Asturianu de Candás 2006, el Taller d’Iniciación al Monologuismu Cómicu Asturianu, baxo la dirección de Carlos Alba, va celebrar la so tercer edición ente los prósimos díes 21 y 25 d’agostu, cola intención de formar interpretes de monólogos cómicos con recursos propios pa interpretar mesmo los grandes testos clásicos como pa facer hestories modernes, fomentando amás la recuperación de la tradición oral y la so adaptación escenica.

Baxo la dirección de Carlos Alba, el III Taller d’Iniciación al Monologuismu Cómicu Asturianu que se va celebrar ente los díes 21 y 25 d’agostu en Candás, va trabayar sobre hestories creaes polos propios participantes asina como que les que recueyan nel so entornu, valorando los materiales del monologuista: un corpus que va dende’l monólogu teatral hasta’l chiste. Cola escucha de grabaciones de monologuistes tradicionales como Arsenio Díaz Pachín, Antonio Medio, Xose La Guardada, Martín Prado, Pandiella o Pin de la Cotolla, va trabayase tamien la respiración y la impostación, asina como la improvisación, la interpretación y les formes de preparar un testu o d’atopar un personaxe.

El director del cursu, Carlos Alba (Cellero), ye monologuista, actor, cuentacuentos y periodista. Como monologuista tien tres espectáculos unipersonales: Por falar vencí la güestia, basáu en cancios y testos clásicos de finales del sieglu XIX y primeros del XX (Baldomero Fernández, Flórez y González, Pepín Quevedo, Marcos del Torniello). ¡Del chigre!, de monólogos propios y actuales nos que mos fala dende les marees negres de galipote hasta les carreres de Fernando Alonso; y Cellero, el monologuista, un amiestu de testos descritores del sieglu XX (Delestal, Sarandeses, Sánchez Vicente, García Oliveros), con hestories propies y socedíos populares. Davezu actúa en teatros, cases de cultura, festivales y fiestes.