Empiecen les clases na Escuela de Música Tradicional ‘La Quintana’

La Escuela de Música Tradicional ‘La Quintana’ de Xixón ta a piques d’empezar el cursu 2006/2007, cuya presentación de les clases va ser esti xueves 28 de setiembre, a partir de les 7 la tarde na so se, nel Colexu Públicu Rei Pelayu, na Avenida Constitución, onde se va recibir a toles persones interesaes n’asistir a les clases. El cursu cuenta con profesores que son al tiempu músicos de reconocíu prestixu na escena musical asturiana, como Xuan Nel Esposito (curdión), Diego Pangua y Pedro Perez, (gaita), Daniel García de la Cuesta (vigulín y bandurria), David Varela (percusión), Merce Santos (zanfonía), Lorena García, (clarinete) y Ruben Bada (guitarra). Amás, cuentase con ún de les meyores interpretes de l’asturianada, Horacio Huerta, y col harpista gallegu Xavier Gómez.

Les clases práutiques danse individualmente, de manera que l´alumnau va integrándose nel nivel que-y correspuende. Anque, sicasí, pa empobinar a la formación musical en conxuntu, dalgunes de les clases se faigan n’andecha col alumnau d´otros instrumentos.

Los horarios de la Escuela son peles tardes de los llunes, martes, miercoles y xueves, demientres les seis de la tarde nel Colexu Rei Pelayu. Les especialidaes qu’ufierta la escuela son: gaita, tambor, percusión, zanfonía, vigulín, xiblata travesera, curdión, guitarra, harpa celtica, asturianada, clarinete y bandurria. Esti añu, como novedá, comienza a impartise la asignatura de formación en conxunto.

La Escuela de Musica Tradicional La Quintana lleva trabayando nesti proyeutu musical dende 1998, faciendo que, gracies a la demanda de la xente, vaiga creciendo l’enfotu en deprender y mantener viva la trasmisión de la música tradicional asturiana. Asina, La Quintana cumple’l novenu añu poniendo clase de diversos instrumentos, amás d’otres asinatures como folclor y llinguaxe musical.