El Teatru Xovellanos acueye la Soirrée de Roland Petit

Esti sábadu, 31 de xunetu, el Teatru Xovellanos de Xixón va acoyer l’actuación de la compañía de Roland Petit, del que se cunta que nuna representación, Picasso dixo a una de les sos fíes: “Mira, fía mía, esto ye la danza”. “Soirée de danza Roland Petit” ye un programa concebíu alredor de la personalidá artística d’unu de los meyores coreógrafos del mundu y una invitación a viaxar al traviés de la so obra y de les fontes d’inspiración d’un artista que nun dexa de sosprender pola mocedá, modernidá y orixinalidá de los sos ballets”.

Figura indiscutible de la danza y la coreografía, Roland Petit formóse na escuela de ballet de la Ópera de París. El so carisma, talentu y ductilidad según un personal sentío dramáticu y una sofisticación poques vegaes igualaes, convirtiéronlo en lleenda de los escenarios. Nes sos composiciones Petit toma con absoluta llibertái disciplina tres disciplina: ballet clásicu, danza moderna, mímica, music hall… Y la resultancia ye tan apabullantemente plásticu como xenial. Ente les sos composiciones destaquen clásicos como El mozu y la muerte (1946), Los feriantes (1948) y El paraísu perdíu (1967).

El programa componse de pieces como Is There Anybody Out There y Nobody Home, dos solos que formen parte del ballet que Petit creo en 1972 xuntu al grupu Pink Floyd; La Rose Malade, creáu en 1973 pa la gran Maya Plisetskaya a partir d’un poema de William Blake y música de Gustav Mahler o Charlot Danse Avec Nous (los solos: Charlot y la siella y Charlot y les pequeñes zapatielles de ballet) compuestu por Petit como tributu y homenaxe al so gran amigu Charres Chaplin, al que define como’l xeniu de los xenios.