El Seminariu de Filoloxía Asturiana participa nun congresu sobre neoloxismos en Brasil

Los vinientes díes 5 a 8 d’avientu celébrase na Universidá de Sao Paulo (Brasil) el II Congresu Internacional de Neoloxía nes Llingües Romániques (CINEO 2011), un importante eventu mundial d’espertos en neoloxía, la rama de la filoloxía encargada de la creación de nueves pallabres o neoloxismos nel usu de les llingües. Nesti congresu va participar una representación asturiana, formada pol profesor Ramón d’Andrés y les filólogues Sara Gutiérrez Rodríguez y Vanesa Díaz Fanjul, del grupu d’investigación Seminariu de Filoloxía Asturiana de la Universidá d’Uviéu, que van dar una conferencia d’una hora col títulu “El observatorio AsturNeo para el estudio de los neologismos en la lengua asturiana”, dientro la sección “Neoloxía y llingües minoritaries o minorizaes”.

AsturNeo ye l’acrónimu d’Observatoriu Asturianu de Neoloxía, un proyectu d’investigación dirixíu pol profesor Ramón d’Andrés, que se punxo en marcha nel 2010 gracies a un conveniu suscritu pola Universidá d’Uviéu, la Universidá Pompeu Fabra de Barcelona y el la Conseyería de Cultura d’Asturies.

El proyectu AsturNeo inscríbese na Rede d’Observatorios Neolóxicos establecida nuna serie d’universidaes del estáu español, de la Europa llingüísticamente románica, y d’América Llatina; esta Rede coordínase a nivel mundial dende la Universidá Pompeu Fabra de Barcelona. L’oxetivu primordial d’AsturNeo ye l’estudiu estadísticu y científicu de los neoloxismos producíos nel asturianu escritu de dellos diarios dixitales en llingua asturiana, faciendo asina un diagnósticu de la vitalidá de la llingua nesti terrén del léxicu.

Nel congresu CINEO 2011, fadráse una presentación del proyectu nesi foru internacional, al mesmu tiempu que s’avanzarán dellos resultaos provisionales de les investigaciones nos años 2010 y 2011.Nel so día’l Seminariu anuncia que va ufrir información detallada sobre toos estos aspectos.

Páxina web del congresu