El Salón de Teatru Costumista de Candás aporta al ecuador

Cola representación de ‘Paraíso fiscal’, obra de Carmen Campo Mier, a cargu del grupu de Llaranes Santa Bárbara, que ye unu de los estrenos absolutos de la programación d’esti añu, el XXIV Salón de Teatru Costumista de Candás aporta al so ecuador del añu con una programación más llarga y paez qu’esitosa. Cada día hai una cita escénica a les 23 hores nel Teatru Prendes de la capital del Conceyu de Carreño

Mañana xueves sedrá la representación de ‘La mala pata del alcalde’, obra de Pedro Mario Herrera adaptada por José Ramón Oliva, a cargu del grupu El Horreo de Barcia. Y el vienres tocará-y el turnu a la representación de ‘Tu, yo y el vecín’, obra de José Ramón Oliva, a cargu del Grupu de Teatru Asturianu Carbayín, que tamién ye un estrenu absolutu.

El sábadu ta programada la eepresentación de ‘El cantar de los pipiolos’, creada y presentada pol grupu llangreanu Padre Coll.

Toles representaciones tienen llugar a les 23 hores nel Teatru Prendes y la entrada cuesta 6 euros (4 pa socios). Éstes van tar a la venta nel propiu teatru dende una hora enantes de cada función.

El colofón del Salón va ser el próximu vienres 5 de setiembre, cuando van entregase los XII Premios Aurora Sánchez de Teatru Costumista Asturianu, que valoren el llabor d’estes agrupaciones. El títulu del espectáculu d’humor qu’acompaña la entrega de los gallardones lleva’l nome de ‘La gala siempre llama dos veces’, obra de Alain Fernández. La entrada pa presenciar los Auroraye de baldre.