El Rector de la Universidá d’Uviéu aconceyó con representantes del Conceyu Universitariu pol Asturianu

Según informó’l CUPA al traviés d’un comunicáu de prensa, representantes de la organización asturianista y universitaria, que cunta con representación nel Claustru de la Universidá d’Uviéu, aconceyó esti martes 8 de xunetu col Rector de la Universidá, Vicente Gotor.

L’alcuentru celebróse na sede del Rectoráu y ye parte, según comenten nel CUPA, “d’una serie de contactos de trabayu pal entamu de les polítiques de normalización llingüística na Universidá d’Uviéu”.

El primer tema tratáu, sigue’l comunicáu, “foi la crisis creada na Facultá de Filoloxía por mor de la enmienda del profesor Félix Fernández de Castro”. El Rector aseguró a los representantes del CUPA “que tán tomándose los pasos necesarios pa que l’asturianu tea, como Vicente Gotor comprometió nel so programa electoral, nos futuros planes europeos”. Representantes y Rector coincidieron según el CUPA “na necesidá de buscar el consensu perdíu alredor del tema”.

En cuantes a los problemes xeneraos pol refugu de documentos n’asturianu nel Rexistru de la Universidá d’Uviéu, el Rector comprometióse a solucionar el problema al traviés de la firma d’un conveniu col Gobiernu d’Asturies, que permita la esistencia d’un muérganu traductor na Universidá d’Uviéu. Los representantes del CUPA ficieron referencies a la Llei d’Usu del bable/asturianu de 1998 y recalcaron la importancia de solucionar un problema qu’afecta directamente a los drechos básicos de los asturfalantes de la comunidá universitaria.

En cuantes a la normalización del asturianu na Universidá, al traviés de la visibilización del idioma nes dependencies y documentos universitarios y de la promoción del mesmu, comenta’l CUPA que “siguen dándose pasos nel camín positivu nel que se vienen produciendo nos contactos anteriores con D. Vicente Gotor dende la campaña de les elecciones a Rector y van siguir dándose en conceyos posteriores nos que van dir afitándose los puntos a siguir nesi procesu, d’una forma ordenada, progresiva y dialogada”.

El CUPA fai un balance positivu d’esti alcuentru y de los contactos calteníos con esti equipu rectoral nos dos meses que cumplía Gotor nel cargu, el día del alcuentru con representantes del Conceyu Universitariu pol Asturianu.

Pal CUPA agora “ye’l momentu de facer visible qu’Asturies, la so cultura y la so llingua, son una prioridá pa los miembros de la comununidá universitaria y esto tien de facese buscando’l consensu y dexando les discusiones que nun conducen a nengún camín constructivu”.