Portada Educación El Principáu parte más de 600 tablets y mil conexones a internet

El Principáu parte más de 600 tablets y mil conexones a internet

by redacción asturnews

El Principáu vieno acabante entamar a partir más de 600 tablets y mil conexones a internet ente l’alumnáu que lo necesita por tener dificultaes pa siguir les clases telemátiques y d’esta manera van poder reincorporase con normalidá al seguimientu qu’asta agora-yos venía torgáu pola ausencia de conectividá.

Anque dellos conceyos y centros educativos adelantrárense, respondiendo a les necesidaes de los sos estudiantes, el Principáu xunióse al trabayu pa desaniciar la fienda dixital, qu’afecta a unos 6.000 alumnos asturianos. Y asina, cinco selmanes dempués de que se cerraren los centros educativos, la Conseyería d’Educación empezó la repartida de más de 600 equipos y mil conexones a internet, que se suman a los 7.500 equipos de los que disponen los mesmos centros y que tamién se partirán.

Bona parte del material del que dispon la conseyería debese a donaciones y sigún desplicó’l director xeneral d’Enseñances Profesionales, Javier Cueli, la Fundación Edp donó 460 portátiles nuevos, valoraos en 200.000 euros. Tamién hai aportaciones de Telefónica (70 tablets) y 40 móviles vencíos por Xiomi. La Dirección Xeneral d’Estratexa Dixital habilitó más de mil conexones a internet, iniciativa na que collaboraron el Ministeriu d’Educación, la Federación Asturiana de Conceyos y empreses como Orange y Vodafone. Cueli estima la responsabilidá social» de toos ellos. Amás, la iniciativa sigue abierta y nes últimes hores sumáronse Caxa Rural y Asturiana de Cinc.

Pa la repartida de material, que se remite a los conceyos por que estos entamen les entregues, cola ayuda de Cruz Roja, van priorizase a los alumnos que rematen ciclu: segundu de Bachilleratu, FP, cuartu d’ESO y sestu de Primaria. Per otru llau, tamién ufiertaron la so collaboración los Colexos Profesionales d’Inxenieros Informáticos del Principáu d’Asturies, CITIPA y COIIPA, que van ayudar a families y docentes a arreglar les duldes que tengan nel usu de les tecnoloxíes.

Tamién te podria gustar