Portada Política El PAS y Xuventú Asturianista van tar presentes na Manifestación de la Oficialidá

El PAS y Xuventú Asturianista van tar presentes na Manifestación de la Oficialidá

by asturnet

El Partíu Asturianista (PAS) va tar presente na Manifestación pola Oficialidá que convoca la Xunta pola Defensa de la Llingua Asturiana, esti vienres 7 de mayu, XXXI Día de les Lletres Asturianes. Militantes de Xuventú Asturianista y del PAS van repartir los folletos de la so campaña esplicativa, a favor de la oficialidá de la llingua asturiana y escontra “les mentires de los partíos mayoritarios sobre l’idioma”.

Nos folletos asoleyaos pol PAS, que van presentase nun actu de la Xuventú, esti xueves 6 a les 19:30, na Llibrería Alborá de Xixón, amuésense les declaraciones recientes de los llíderes de les “sucursales” asturianes d’IU-BpA, PSOE y PP, ente les que tán negaciones de la propia esistencia de la llingua, promeses incumplíes d’usu del asturianun na Xunta Xeneral y casos de marxinación llingüística a ciudadanos, ente otres cuestiones.

El Partíu Asturianista (PAS) “tien claro que los culpables de la situación de la llingua asturiana tienen nomes y apellíos, son los llíderes de los partíos que mos vienen gobernando nos trenta años últimos, que lloñe de normalizar l’idioma d’Asturies, fueron arrequexándolu cada vegada más”.

La formación política recuerda que lleva pidiendo la oficialidá de la llingua asturiana “dende la so fundación, va 25 años, y consiguió aprobar la Llei d’Usu del asturianu en 1998”, la única llei –recuerden- “que permite defender a los usuarios del asturianu de los abusos del gobiernu del PSOE ya IU-BpA (col sofitu del PP) sobre los ciudadanos”.

El Partíu Asturianista espera qu’esta seya “la cabera manifestación pola oficialidá, anque ye consciente de qu’esto namás va ser posible si se consigue facer del asturianismu políticu verdaderu, una fuercia influyente nes decisiones que se tomen na Xunta Xeneral”. El PAS, termien “trabaya pa volver a la Xunta Xeneral y consiguir pa tolos asturianos la oficialidá y la normalización social del asturianu”.

Tamién te podria gustar