El Partíu Popular súmase a PSOE, UGT y CC.OO. contra la valoración del asturianu nes oposiciones

El secretariu xeneral del PP asturianu, Fernando Goñi, y el voceru na Xunta Xeneral, Joaquín Aréstegui, dieron un pasu más nel alloñamientu de los populares dende les posiciones pro-oficialidá qu’amosare enantes de les elecciones xenerales de 2007, l’entós candidatu, Gabino de Lorenzo. Los diputaos populares manifestaron ayeri en Cangas el refugu de la so formación a la iniciativa d’esti conceyu “de premiar con más puntos la conocencia d’asturianu nes convocatories d’empléu públicu municipales”.

Goñi y Aréstegui acudieron el miércoles a Cangas col envís d’apoyar a los miembros de la xunta xestora que gobierna’l PP cangués dende la espulsión de los conceyales de la formación, que votaron a favor del Plan de Normalización Llingüística qu’inclúi la midida cuestionada polos diputaos.

Goñi quixo aclariar qu’en nengún casu, “baxo nenguna circunstancia, les opiniones o actos d’esos señores puen imputase al PP”. Pal secretariu xeneral del PP asturianu “embaxo les sigles del PP nunca se votare dalgo manifiestamente contrario a los nuesos ideales, como ye discriminar a les persones en función de la llingua que falen”.

Aréstegui esplicó que “tamos en contra de cualesquier obligatoriedá ya imposición. Esto ruempe hasta la unidá de mercáu, pues entorpez que dalguién de fuera quiera venir a trabayar equí”. El voceru popular na Xunta utilizó’l mesmu argumentu que’l Gobiernu del PSOE-IX “el gobiernu cangués ta diendo en contra d’un plan de normalización llingüística aprobáu por unanimidá na Xunta”.