El nuevu Gobiernu estudiará la propuesta de Xuristes de que tolos impresos vaigan en billingüe

Xuristes pol Asturianu fizo pública la carta que-yos fizo llegar el Conseyeru de Cultura y Deporte, Marcos Vallaure, en respuesta a la so petición de que tolos impresos alministrativos de los organismos públicos del país tuvieren redactaos en versión billingüe asturianu-castellán. Nella, Vallaure valora “positivamente” la propuesta y fala d’estudiala como “posible midida de normalización llingüística”.

Pa Xurde Blanco, cabezaleru de Xuristes pol Asturianu, esta contestación fecha pol Conseyeru (y n’asturianu) supón un cambiu importante dempués d’años de “política llingüicida y clientelista de los gobiernos d’Areces”, qu’esplica “obligaron al Aconceyamientu de Xuristes pol Asturianu a tener qu’amosar de contino y per años, la so cara más combativa y fosca: la única posible cuando se llucha pola sobrevivencia”.

Pa Xuristes, “avezaos -afirmen- al tratu arispiu, cuando non direutamente a l’aición represiva, del vieyu gobiernu” les pallabres del nuevu Conseyeru son calificaes como “respetuoses” y como dalgo que-yos da pie a la esperanza. AXA aguarda agora poder caltener una postura “negociante y comprensiva” anque, recuerden, “dando pasos, midíos pero decidíos, p’hacia una sociedá asturiana dafechamente tolerante pa colos drechos llingüísticos de tolos sos ciudadanos”.