El llunes entama l’Amuesa de Cine Social en Xixón

Acción en Rede y Amnistía Internacional entamen la IV Amuesa de Cine Social y Derechos Humanos d’Asturies que va inaugurase esti lunes venideru.

Esta amuesa, qu’ufierta una amplia panorámica d’un cine diversu, inquietu y comprometíu, va ser inaugurada’l próximu llunes 30 de noviembre, a les 20 h. nel Teatru Xovellanos de Xixón, col estrenu nacional de la película “Techu y comida”, una hestoria qu’enceta distintos problemes sociales derivaos de la crisis económica. A la proyección va asistir el so director, Juan Miguel del Castillo.

Les películes escoyíes nesta cuarta edición, que se van esibir en Xixón, Avilés, Uviéu, Llangréu y Cangues d’Onís a lo llargo d’avientu y xineru, fueron reconocíes y premiaes en distintos festivales internacionales, asitiándose nuna estrecha frontera ente la ficción y el documental. A les proyecciones abiertes al públicu suman dellos centros educativos d’Asturies al traviés del proyectu EDUCA_CINEDH, que la so finalidá ye utilizar el cine como ferramienta educativo pa trabayar los derechos humanos nun marcu d’aprendizaxe interactivo y participativu.

Pensamientu críticu y realidá social danse la mano cola firme intención de que les persones asitiaes al otru llau de la pantalla sían conscientes de la realidá que nos arrodia, pasu previu pa poder implicase, con argumentos y razones, nuna acción individual que puede tener múltiples víes de canalización, ente elles, la participación activa nos colectivos qu’impulsamos esta Amuesa de Cine.

El cine ye, ensin dulda, una ferramienta indispensable p’averanos a la vida de persones en llugares y situaciones que, si nun ye al traviés de la pantalla, seríanos casi imposible conocer. Les asociaciones organizadores tienen una llarga trayectoria nel ámbitu de la reivindicación y profundización na conocencia de los derechos humanos; integraes por activistes, socio/as y persones voluntaries que trabayen pola xusticia y la dignidá de les persones, lleven años combatiendo los abusos contra los derechos humanos de víctimes con nome y apellíos al traviés de la investigación, la denuncia pública y l’activismu.