El Liet international llega va trayer a Xixón la música en llingües minorizaes de toa Europa

La Conseyería d’Educación, Cultura y Deporte, al traviés de la Dirección Xeneral de Política Llingüística, entama’l Festival Liet International 2012, un eventu musical internacional nel que compiten once grupos que canten na llingua de la minoría llingüística europea a la que pertenecen y que llega per primer vegada a Asturies y na Península na so décima edición. Esti festival, consideráu l’Eurovisión de les llingües minorizaes, va celebrase’l próximu 1 d’avientu, a les 21.30 hores, nel Teatru de la Llaboral, en Xixón. La entrada ye llibre hasta completar l’aforu previa retirada d’invitaciones en La Llaboral y nel Centru Niemeyer.

Ta acabante estrenase una páxina web dedicada al eventu, onde se da información de los grupos participantes, amás d’otres cuestiones, n’asturianu, castellán ya inglés.

Grupos participantes por países.

Frisia. Yldau, Fjoer.

Yldau Bijlsma (voz principal) y Yldau Hoekstra (voz principal) tuvieron la idea de participar nel certame Liet 2012 de la canción en lligua frisona. Una y bona escribieron la lletra del cantar, pidieron a Jan Hoekstra –hermanu d’una d’elles– que les ayudara a componer la música.

Baxa Saxonia. The Voodooelectric, Slickermuul.

The Voodoolectric fixeron historia al ganar, col cantar «Slickermuul», la primer edición de Plattsounds, el concursu de música pa cantares nuevos en baxu saxón, celebráu n’Oldemburgo nel 2011.

Bretaña. Lleuwen, Ar Gouloù Bev.

Lleuwen va representar a Bretaña y la llingua bretona nel festival Liet International Asturies 2012 col cantar «Ar Gouloù Bev». La cantante Lleuwen Steffan ye, amás, multillingüe d’una manera especial: nacida y criada nel norte de Gales, vive normalmente en Bretaña, onde aprendió a falar y cantar en bretón.

Friul. Jo No Kognos, Mai mai.

Los Jonokognos son una banda de folk rock en llingua friulana, caracterizada por sonoridaes rítmiques dacuando melódiques. Les sos lletres tratan d’amistá, marxinación, amor y odiu. El grupu, compuestu por Luca D’Angela (voz y guitarra), Simone Mariotti (guitarra), Mauro Pontisso (baxu), Luca Morassutti (percusión) y Stefano Locatelli (batería), forma parte del sellu independiente Musiche Furlane Fuarte.

Udmurtia. Ivan Belosludtsev & 4cp, Tau Teeneed

Ivan Belosludtsev empezó a componer na so llingua, l’udmurtu, al entrar na universidá. Un grupu de promoción descubriólu y púnxolu al frente d’una banda de músicos profesionales. Ellos arropen les lletres y música d’Ivan: moza, independiente, actual, al empar qu’auténtica y cosmopolita.

Sápmi. Inger Karoline Gaup, Oainnát go?

Inger Karoline Gaup ye una cantautora de 17 años, procedente de Masi in Inner Finnmark, una aldea sami asitiada en Noruega. Nel 2011 participó pela primer vez nel certame anual Sámi Grand Prix (SGP) –que se celebra pela Pascua en Kautokeino (Noruega)–, onde quedó nel segundu puestu gracies al cantar d’amor «Don dat leat (Yes tu)».

País Vascu. Enkore, Muxurik Muxu.

Enkore ye una banda de rock moza, creada nel 2009 nel barriu bilbaín de Rekalde. Hasta la fecha, sacaron dos EPs (Multiplo Komunetako Txikiena y Zatitzaile Komunetako Handiena) y un single (Zer Garen).

Córcega. Dopu Cena, Trasmetta.

Dopu Cena ye un colectivu de músicos multi-instrumentistes que tienen como oxetivu principal revalorizar toles espresiones musicales de la tradición oral corsa.

L’Alguer. C. Crabuzza y C. G. Sanna, Ara.

Claudia Crabuzza ye una cantautora de L’Alguer (Sicilia), voz y líder del grupu Chichimeca, col que publicó los discos Barbari y Luce-Nur. Pela so parte, el tamién alguerés Claudio Gabriel Sanna ye fundador y líder del grupu Càlic.

Escocia. Brian Ó hEadhra, Fathainn.

Brian Ó hEadhra ye ún de los músicos escoceses más asentaos y conocíos. Vive n’Inverness, nes Tierres Altes d’Escocia, y actúa normalmente col cuartetu gaélicu Cruinn, amás de con Bruce MacGregor (violín) y Sandy Brechin (acordión) nel tríu MacGregor, Brechan & Ó hEadhra.

Asturies. Asturiana Mining Company, Si nun conoces Val.louta

Michael Lee Wolfe funda Asturiana Mining Company nel añu 1998 con músicos mui conocíos de la escena folk, rock y jazz n’Asturies. La formación graba nel añu 2000 el primer discu, col títulu Patrimoniu.

Páxina web del festival