“El judio errado” preséntase estos díes n’Uviéu y Xixón

Güei, xueves 9, tendrá llugar la presentación del llibru “El judio errado” nel llocal Sestaferia de Xixón, a les siete y media. El vienres 10 a les 19:30 hores tendrá llugar la presentación del mesmu llibru n’Uviéu, nel llocal de Cambalache (Cai Martínez Vigil, 30). Les presentaciones organícenles el Comité de Solidaridá cola Causa Árabe n’Asturies, cola collaboración de Sestaferia y Cambalache.

L’autor d’esti llibru, Alberto Pradilla, conxuga la investigación, el rigor periodísticu y la esperiencia personal pa llamar l’atención sobre’l qu’albidra ún de los pilares del conflictu arabe-israelí: el propiu Estáu d’Israel.

La crónica y les entrevistes con dalgunos de los protagonistes de dichu conflictu avérennos a la mentalidá y forma de ser d’un Estáu que califica de “colonial” y que diz, “amás de colos sos vecinos, tién un grave problema consigo mesmu”. Izquierda y drecha; ultraortodoxia y llaicismu; movimientos pro-palestinos y colonos xudíos completen una mezcla esplosiva que fai d’Israel un país que se define como ‘xudíu y democráticu’ pero que l’autor califica como “democráticu pa los xudíos y, penriba de too, xudíu pa los palestinos”.

Fragmentu del llibru