El III Concursu de Mascotes Antroxaes d’Avilés estrena allugamientu na Antigua Pescadería

El III Concursu de Mascotes Antroxaes d’Avilés, que va tener llugar el domingu 3 de marzu a les 16,30 hores, estrena allugamientu na Antigua Pescadería. Nun ye necesaria inscripción previa y van concedese cuatro premios d’ente 50 y 125 euros.

La tercer edición del Concursu de Mascotes Antroxaes va celebrase’l domingu 3 de marzu a les 16:30 hores y estrena allugamientu nel Edificiu de l’Antigua Pescadería (Plaza Santiago López). L’oxetivu del concursu ye valorar la exhibición de mascotes amarutaes nes Fiestes del Antroxu, con participación d’ámbitu comarcal.

Va Poder concursar cualquier tipu de mascotes comunes, sacante perros potencialmente peligrosos nin animales exóticos. Nun ye necesaria inscripción previa. va valorase la orixinalidá, la calidá y l’esfuerzu del disfraz, según la simpatía de la mascota. Les mascotes van desfilar por una pasarela preparada al efeuto. Pela so parte, los premios suman un total de 350 euros, partiéndose asina: primer premiu 125 euros, segundu premiu 100, tercer premiu 75 y el cuartu premiu 50.

La organización acútase’l derechu de refugar a aquellos participantes qu’al so xuiciu entorpezcan o pongan en peligru’l desenvolvimientu y la seguridá del eventu, yá sía pol comportamientu del animal, la calidá del disfraz presentáu, la falta d’aséu de la mascota…

Les mascotes ganadores el pasáu añu fueron: en primer llugar Cocu, un chihuahua negru vistíu de mazana; en segundu puestu Sheldon, llabrador amarutáu de lleón; en tercer posición la perrina Lúa, afatiada con un coche DeLorean, y la cuarta finalista Kira, yorkshire vistida de xugadora de rugby.

Les bases completes pueden consultase nel siguiente enllaz:   http://aviles.es/documents/12305/846219/Convocatoria+Concurso+de+Mascotas.pdf/