Portada Música El grupu folk Corquiéu entama nes prósimes selmanes una xira per Bélxica y Holanda

El grupu folk Corquiéu entama nes prósimes selmanes una xira per Bélxica y Holanda

by asturnet

La capital de los asturianos emigraos en Bélxica, Bruseles va acoyer nel prósimu mes de payares entrambos conciertos del grupu Corquiéu. La cita va ser los díes 16 y 21 de payares. De metanes la banda asturiana va entamar una minixira d’actuaciones per delles ciudaes holandeses como Hoogeveen, Den Helder, An Tiel y Laeu Warden. El grupu nacíu en Ribesella y que cunta cola presencia del ex miembru de Beleño, Frankie Delgado y de la cantante Genma García, emprima asina un viaxe que los va llevar a ufierta una amuesa del so trabayu fuera de les llendes del país.

El calandariu de la minixira de Corquiéu empieza el 16 de payares en Bruseles y sigue nos díes 17, 18, 19 y 20 peles citaes ciudaes holandeses pa rematar el día 21 con un nuevu conciertu na capital asturiana de Bélxica.

La banda ta formada polos músicos Pablo Valdés, a la guitarra acústica; David Mateos, bodhran y caxón flamencu; Frankie Delgado, al violín; Paul Balmori, al bouzouki; Roberto Suárez, a la gaita asturiana; y la cantante Genmma García. Surdíu en Ribesella nel añu 1998, Corquiéu, tien nel so haber un trabayu discográficu tituláu ‘La Barquera’ (L’Aguañaz, 2001), nel qu’ufierta once de los temes del so repertoriu. AL empar tien participao en discos colectivos como el volume 18 del recopilatoriu ‘Céltica'(Trentini, 2002) y n’otru discu que recueye actuaciones del Tonder Festival de Dinamarca (Millstream Read, 2003). Dende la so criación y les sos primeres actuaciones n’escenarios del país, el grupu Corquiéu, tien amosao un trabayu calterizáu por un son enérxicu y innovador dientro’l panorama folk astur.

Tamién te podria gustar