El Santu Grial y Javier Sierra ganen el Premiu Planeta

El Grial de Javier Sierra gana’l Planeta col títulu “El fueu invisible” una novela que narra la busca del cáliz de Cristu per Madrid, xusto cuando’l grupu editorial que convoca’l premiu vieno acabante d’anunciar el treslláu de la so see social a la capital d’España.

Pero ‘El fueu invisible’, del superventas Javier Sierra (Teruel, 1971), nun xurga en combalechadures polítiques sinón que failo nuna tema fondiada nel imaxinariu lliterariu occidental dende’l sieglu XII, cuando’l poeta Chrétien de Troyes, en ‘Perceval’, referíase a él per primera vegada.

En ‘El fueu invisible’, atopamos a un nuevu profesor de la Universidá de Dublín, de raigaños españoles y nietu d’un famosu escritor fináu, que llega a Madrid a pasar unos díes y vese implicáu nun misteriosu grupu d’estudiu que sigue’l rastru del Santu Grial nos campos de la lliteratura y l’arte. Lo que paez primeramente una mera investigación científica va vese complicada al ser asesináu unu de los miembros d’esti grupu. La erudición y los munchos referentes culturales ensertaos nuna acción azogosa –unu de les traces distintives del autor– dan pie a un relatu que puede ampliar el públicu de Sierra.

Sierra, traducíu en trenta países, ye unu de los escasos autores españoles, col barcelonés Carlos Ruiz Zafón, que sabe lo que significa tener una de les sos noveles ente les más vendíes d’EE.XX. Asocedió-y con “La cena secreta” (2004), onde un inquisidor dominicu viaxa a supervisar los trazos finales que Leonardo Da Vinci da a ‘La última cena’, sollertáu ante les herejías que pueda afigurar esi llenzu. Pero la primer novela de Sierra foi “La dama azul” (1998), darréu reescrita, sobro apaiciones y viaxes nel tiempu; siguieron ‘Les puertes templaries’ (2000), sobre los oríxenes de la orde del Temple investigaos dende los satélites actuales; ‘L’ánxel perdíu’ (2011), una hestoria con piedres que dexen conectar con entes sobrenaturales, ambientada na catedral de Santiago, Finisterre y Turquía, concretamente nel monte Ararat –que Sierra esguiló– onde la tradición diz que s’atopa soterrada l’Arca de Noé; ‘El maestru del Prau’ (2013), que percuerre les hestories ocultes tres les principales obres de la pinacoteca madrilana; o ‘La pirámide inmortal’ (2014), nueva (y bien camudada) versión de ‘El secretu exipciu de Napoleón’ (2002).