El Gobiernu visita’l stand d’Uviéu na FIDMA

El stand d’Uviéu na Feria Internacional d’Amueses d’Asturies (FIDMA), asitiáu nel salón Asturies, nel primer pisu del pabellón númberu trés, recibió esti llunes la visita institucional del Gobiernu del Principáu y de la Cámara de Comerciu de Xixón. Encabezada pol Presidente asturianu, Javier Fernández, la comitiva foi recibida pola alcaldesa en funciones del Conceyu d’Uviéu, Ana Rivas, y tamién polos conceyales Rubén Rosón, Ricardo Fernández y Cristina Pontón.

Ente les autoridaes que participaron na visita tamién s’atopaba’l Conseyeru de Turismu, Emplegu ya Industria del Principáu, Francisco Blanco; el Rector de la Universidá d’Uviéu, Santiago García Granda o’l Presidente de la Cámara de Comerciu de Xixón, Félix Baragaño.

Ana Rivas comentó col Xefe del Executivu asturianu’l conteníu de l’amuesa “Santullano desveláu”, qu’ocupa parte de los 600 metros cuadraos del stand d’Uviéu na Feria y destacáu “l’aciertu que supunxo aunir nuna mesma superficie la nuesa riqueza gastronómica, en concretu confitera y repostera, cola cultural y patrimonial”. Prueba d’ello ye que, mientres esta pasada fin de selmana, yá visitaron el stand d’Uviéu más de 2.500 persones, según conteo sala.