El Gobiernu va presentar pala seronda la evaluación del plan de normalización

La conseyera de Cultura y Turismu del Principáu d’Asturies, Encarna Rodríguez, comprometióse esti día, sigún Europa Press a que’l so equipu presente a primeros del próximu periodu de sesiones, en setiembre o ochobre, l’informe d’evaluación del plan de normalización del asturianu. A pesar de qu’una resolución aprobada nel Alderique d’Orientación Política, celebráu n’ochobre del 2007 indicaba que l’informe debía presentase a finales d’esi añu, Encarna Rodríguez esplicó que nun se pudo realizar la evaluación completa, dao que’l plan van prollongase hasta finales del exerciciu.

Encarna Rodríguez realizó estes manifestaciones nel trescursu de la so intervención nel Plenu de la Xunta Xeneral del Principáu d’Asturies (XXPA), onde foi entrugada pol diputáu d’IX-BA-Verdes, Francisco Javier García Valledor, sobre la política llingüística. Valledor acusó al Gobiernu de non cumplir los mandaos de la Xunta y d’aplicar polítiques ‘involucionistes’.

“Un plan qu’acaba’l 31 d’avientu del 2007 difícilmente pue ser evaluáu enantes”, señaló la conseyera de Cultura. Asina, dixo que’l plan ta “entamando a evaluase”. Per otru llau, defendió les polítiques del Principáu en rellación a la promoción del asturianu. Nesti sen dixo que dende’l Gobiernu d’Asturies tán “comprometíos” col fomentu “firme” y “progresivu” del asturianu y del gallego-asturianu. “Continuamos con toles llinies de trabayu abiertes n’otres llexislatures”, afirmó, y punxo como exemplu les sovenciones pa potenciar l’asturianu, l’aumentu de la so presencia na RTPA, asina como l’ampliación del númberu d’oficines de normalización llingüística.

Sigún Europa Press, a Valledor nun lu convencieron les esplicaciones d’Encarna Rodríguez y mostróse “preocupáu” polos sos incumplimientos en rellación a les resoluciones de la Xunta. Reprochó amás el restu de polítiques del Principáu na materia. Asina, desplicó que la Xunta de Toponimia malpenes s’aconceya nos últimos meses. “Hai una paralización y una vuelta p’atrás”, señaló y dixo que se tán “desandando” los pasos que se dieron na llexislatura anterior en materia de campañes d’información, rotulaciones, documentos de l’Alministración o enseñanza nos colexos.