El Gobiernu de la FSA-PSOE sigue recortando al asturianu mientres dexa intactes otres partíes de Cultura

El Gobiernu de Javier Fernández (FSA-PSOE) ta acabante anunciar al traviés del BOPA un nuevu amenorgamientu de los prespuestos dedicaos a normalización llingüística. La partida afectada nesti casu ye la dedicada a Normalización social del asturianu y gallego-asturianu pa les entidaes llocales, una ayudes que, según espliquen dende Iniciativa pol Asturianu, quien denunció esti recorte, “sirven pa llevar a los conceyos, la entidá alministrativa más cercana al ciudadanu, les polítiques de normalización llingüística, qu’amás xeneren emplegos al traviés de los servicios de normalización”.

Dende Iniciativa pol Asturianu denuncien lo que consideren como “nuevu ataque al asturianu”. Y ye que, pa la organización “llama l’atención que dientro de la mesma partida, onde tamién apaecen ayudes a museos y colecciones museográfiques y a programes añales d’actividaes culturales, seya les ayudes al asturianu les úniques que se vean afectaes”. Espliquen amás que y”á yera la menor de les partíes, con 92.400 euros, frente a los 96.000 y 114.800 euros de les otres dos partíes”.

D’esta manera, espliquen dende Iniciativa pol Asturianu, “recortáse otra vegada onde menos hai pa recortar, dexando al asturianu nuna situación cada vegada más débil”. Reclamen al Gobiernu d’Asturies, que “si ha de facer recortes, faiga los mesmos de forma proporcional en toles partíes, y nun cargue, como yá vieno faciendo a lo llargo de los meses últimos, contra la llingua asturiana”.

Iniciativa pol Asturianu va aconceyar la selmana que vien colos grupos políticos presentes na Xunta Xeneral y llevará esta cuestión, ente otres munches. Pel momentu namás Izquierda Xunida d’Asturies y Foru respondieron al pidimientu de conceyu de la organización, pero esperen “poder falar con tolos partíos presentes nel parllamentu asturianu y face-yos llegar esta y otres cuestiones urxentes pal idioma asturianu”.

Recorte denunciáu (nel BOPA)