El FICX va cuntar con una nueva sala de cine na antigua Escuela de Comerciu

El Festival Internacional de Cine de Xixón (FICX) va disponer na próxima edición d’una nueva sala con capacidá pa unes 120 persones n’acabante reformar y estrenada Escuela de Comerciu. Gánase, d’esta forma, un nuevu espaciu nel centru de la ciudá, que sumase al Centru de Cultura Antiguu Institutu y el Teatru Xovellanos.

Como quiera que’l certame xixonés perdió la centralidá col zarru de los Cines Centro y munches de les sos proyecciones emigraron escontra los Yelmo de La Calzada, la organización de la cita cinematográfica tenía especial interés en cuntar con un nuevu espaciu nel corazón de la ciudá que ta confirmáu que va tar disponible en payares. Cúntase yá con una acabante adquirir pantalla para les proyecciones que garantiza la calidá de les mesmes.

A los espacios citaos, xúnense la Llaboral y el Centru Municipal Pumarín Xixón-Sur, qu’igualmente van acoyer les proyecciones del FICX. Con vistes a la nueva edición que va llegar en payares, tou indica que nun va haber más novedaes tocantes a espacios. Magar se llegó a especular con que los Cines Centro pudieren recuperar la so actividá cinematográfica comercial, finalmente tou indica que nun va ser posible qu’eso asoceda, de forma que un bon númberu de les películes van ver nos Yelmu.

Foi’l pasáu añu cuando s’estrenó esta see y establecióse un serviciu d’autobuses lanzadera para conectar les sales y facilitar asina’l tresporte. Magar les medranes, finalmente l’asistencia de públicu a La Calzada nun se vio amenorgada pola distancia d’estos cines del centru de la ciudá. Sía que non, dende la organización amuésense felices de poder establecer cola Escuela de Comerciu esi nuevu triángulu central.