El Festival N’Alcordanza 2017 celébrase’l sábadu primeru de xunetu

Esti sábadu 1 de xunetu va desenvolvese en Xixón el festival N’Alcordanza, en memoria y homenaxe de los músicos asturianos Ígor Medio y Carlos Redondo, finaos n’accidente de tráficu en 2006. Amás de la faceta señardosa, el festival tamién tresmite un mensaxe reivindicativu al rodiu a l’actividá musical profesional.

La edición de 2017 va ser un pocu distinta a la de los últimos años. Los conciertos van concentrase en dos locales de la ciudá, La Vida Alegre y El Savoy, abellugu habitual de la música en direutu nesta ciudá. Dende hai 10 años, grupos y locales de la ciudá de Xixón axúntense alredor de l’alcordanza de Ígor Medio y Carlos Redondo, pero tamién como eventu reivindicativu reclamando más considerancia pal oficiu de músicu, asina como cambeos llexislativos pa faer más vidable l’actividá musical profesional. En 2017 el Festival quier xunir la so voz especialmente a aquelles que vienen reclamando la normalización y llegalización de la música en directu en Asturies, que nes últimes selmanes convirtióse en reivindicación na cai y tema de discutiniu nes instituciones polítiques asturianes.

N’Alcordanza tamién quier sirvir d’altavoz pa reivindicar una meyor considerancia, per parte de munchos sectores, del oficiu de músicu. Una lexislación llaboral específica que tenga en cuenta les circunstancies especiales qu’arrodien l’oficiu de la música, asina como esaniciar torgues pa la programación de música en directu. En resume, un mensaxe que tien que llegar a les instituciones, el públicu y les mesmes persones que quieren vivir de la música. N’Alcordanza ye memoria, pero tamién ye una cellebración de la música asturiana y les persones que, munches vegaes contra vientu y marea, fáenla posible.

La programación de los conciertos d’esti añu’l sábadu 1 de xunetu ye:

18:00 hores, La Vida Alegre, Cai Bon Sucesu, 8, Xixón
• Felpeyu
• Caldo y Os Rabizos
• LR

00:00 hores, El Savoy , cai Covadonga nº5 Xixón

• Seasounds
• Radio Fox
• Mamy Carter
• Keep Karma
• Últimos de Filipinas