El Festival Intercélticu d’Occidente celebra esta selmana la so décima edición

El Festival Intercelticu d’Occidente celebra esti añu la so decima edición, efemeride pa la que la organización, los miembros del Grupu de Gaites Marino Tapiega, de Tapia de Casariego, tienen preparao una completa amuesa de música tradicional, conferencies, esposiciones, proyecciones, talleres y desfiles, ente los que nun van faltar la clásica Noite Máxica y la misa folclórica. El festival, que va ser inauguráu esta tarde nel Salón de Plenos del Ayuntamientu de Tapia pol director xeneral de Cultura, Carlos Madera, l’alcade, Gervasio Acevedo, el conceyal de Cultura, Francisco Perez Sanjurjo, y el director del Festival, Martín Fdez. Cascudo, va durar hasta’l prósimu llunes 21 d’agostu.

Na inauguración que va tener llugar a les ocho la tarde van intervenir les bandes Isla Cumbrae RBLS Pipe Band, la Banda de Gaites Noceda, la Bagad Penhars y la Banda de Gaites Villa de Mieres. De siguío, nel Insitutu Marques de Casariego va proyectase’l videu ‘Arboles y bosques de Asturias’ mentes que nel Salón de Plenos del Ayuntamientu Pablo González va ufiertar una conferencia sobre’l folclore gallegu. A les once de la nueche, Los Llanzones van dar una verbena tradicional asturiana nel Puertu de Tapia de Casariego.

Mañana xueves, a les doce, va proyectase’l videu ‘Instrumentos Tradicionales II’ mentes qu’a les once y media, na Sala de talleres del Institutu Marques de Casariego, David Varela va dar un cursu intensivu de curdión diatónica. Pela so parte, la Banda de Gaites de Maceda va desfilar per Tapia y el Puertu, mentes que la Bagd Penhars va facer una muestra de folclore bretón na Plaza l’Ayuntamientu.

La tarde de mañana va siguir col cursu de David Varela, asina como con un desfile de la Banda de Gaites Villa de Mieres y una conferencia sobre’l futuru de la gaita en Galicia de mano del director de la Banda de Gaites Maceda, pa terminar a les once la nueche, na Playa del Murallón, cola celebración de la Noite Folk.

El vienres 18 d’agostu va empezar cola proyección del videu ‘Picos de Europa’, mentes que nel aula del Insitutu una charra-coloquiu sobre la gaita escocesa va dar pasu a un cursu de tambor a cargu de Manuel Durán, que siguirá a les seis de la tarde, hora na que tamien se va celebrar un concursu de postres tradicionales. A les ocho y media la tarde, el folclore dende la emigración va ser la conferencia a celebrar na Sala del Institutu Marques de Casariego. A les once la nueche va volver celebrase una Noite Folk na Playa del Murallón col grupu Filska d’Escocia.

El sábadu 19 d’agostu’l vidiu a proyectar ye ‘La sidra de Asturias’ mentes que la Plaza l’Ayuntamientu va acoyer un taller de dances gallegues. Tres de l’actuación de la Banda de Gaites de Maceda y Bagad Penhars, el programa tien previsto a les seis de la tarde una carrega de Galochos, un torneu de xuegu de la rana y una carrera d’anducas. Yá de nueche, na Playa del Murallón, va celebrase l’espectáculu de la Gran Noite Máxica.

El domingu 20 d’agostu tendrá llugar la Misa Folclórica celebrada por Eugenio Maseda, tres de la que siguirán los desfiles y talleres previstos, hasta’l final del festival, el llunes 21 d’agostu.