El Festival de Zarzuela celebra so 25 aniversariu y entama’l día 15 col “El Cantor de México”

El Festival de Zarzuela celebra’l so 25 aniversariu y va entamar el próximu día 15 col “El Cantor de México”. El ciclu d’anguaño va incluyir meses d’alderique para analizar y lluchar pol futuru d’esti xéneru.

El presidente de la Fundación Municipal de Cultura y edil de Cultura vieno acabante presentar el Festival de Teatru Llíricu Español qu’anguaño celebra’l so 25 aniversariu y que va entamar el próximu día 15 cola puesta n’escena de “El Cantor de México”, una versión del asturianu Emilio Sagi. Na presentación tamién tuvieron presente Ánxeles Rivero, directora de La Nueva España; el responsable municipal del ciclu y coordinador del mesmu, Cosme Marina y Francisco González Álvarez-Buylla, Presidente Fundación Musical ‘Ciudá d’Uviéu’ y Presidente Capiya Polifónica ‘Ciudá d’Uviéu.

“El Festival de zarzuela cumple 25 años y namái queden dos temporaes n’España, en Madrid y la nuesa, nel Campoamor. Ye una alarma colorada que nos lleva a cavilgar qué ta pasando. La zarzuela siempres foi un preséu de les clases populares nel que, al traviés de la opereta, poner de manifiestu esi sentimientu críticu cola sociedá. Asina, una de les novedaes, ye que vamos poner en marcha meses d’alderique para faer una reflexón sobro la zarzuela y analizar el so pasáu, presente y futuru. Nun arrenunciamos nin queremos arrenunciar a la zarzuela, pero somos conscientes de que precisamos nueves moliciones intelectuales, nuevos públicos y nuevos llibretos”, señaló Sánchez Ramos.

Cosme Marina desglosó los llibretos que van conformar el Festival, qu’arrinca’l próximu día 15, con “El Cantor de México”, “una opereta de la mano de Sagi, una fiesta de los sentíos”. La siguiente va ser “La verbena del Palombu. Pensión completa”, 9 y 10 de marzu, una versión de Maxi Rodríguez, que retoma esta faceta tres l’ésitu del sainete llíricu tituláu Maharajá, que tolos presentes apostaron por recuperar n’otros teatros. “La malquerida” va llegar al Campoamor el 12 y 14 d’abril y a lo último, el 7 y 9 de xunu, “La Tabernera del puertu”, “qu’entá nun s’estrenó. va facer en Madrid en mayu y de siguío, va tar n’Uviéu”, adelantró Marina.