El Descensu más seguru

Esti sábadu, 20 d’agostu, les carroces van volver dar vida al Descensu Folclóricu del Nalón. Pa esti añu l’ayuntamientu tien previstu’l mayor dispositivu de seguridá de los trenta y ocho años d’historia de la fiesta, con más de 150 persones encargaes de cuidar especialmente’l pasu les carroces per Puente d’Arcu, yá que, pola sequía, tien baxao en 1’20 metros la profundidá del ríu.

L’operativu de seguridá previstu pal Descensu Folclóricu del Nalón cuenta con más de 150 persones, ente miembros de la Policía Local, la Guardia Civil, REMER, 112, Bomberos, Cruz Roja y el Serviciu de Salú del Principáu, que controlarán el pasu de les carroces y los participantes pel kilómetru y mediu de percorríu. Amás, les cais de la movida van tar cortaes de diez de la nueche a siete la mañana pa evitar cualquier tipu d’accidente. Tamien la cai Libertad va tar cortada a partir de les cuatro la tarde. Hora na que ta previsto qu’empiece’l desfile de les carroces.

La seca d’esti añu fai necesaria una suelta d’agua dende Tanes al ríu Nalón. De toes maneres, Protección Civil insistió en que, pola sequía, el puntu onde hai que tener más cuidao ye a l’altura de Puente d’Arcu, yá que la profundidá del ríu baxó en 1’20 metros.

Toes aquelles persones que quieran aprovechar la fiesta pa dir d’acampada, van tener habilitada dende mañana vienres la zona que ta xunta’l Polideportivu.