El Conceyu Universitariu pol Asturianu espera que la Xunta d’Escuela de Maxisteriu apruebe la mención d’asturianu

El Conceyu Universitariu pol Asturianu espera que la Xunta d’Escuela de Maxisteriu apruebe la mención d’asturianu, colo que l’asturianu taría, como en Filoloxía, per primer vegada como títulu dafechu oficial.

El Conceyu Universitariu pol Asturianu (CUPA), organización independiente asturianista y universitaria na que participen alumnos, personal d’alministración y servicios y vieyos alumnos y que cunta con representación nel Claustru de la Universidá d’Uviéu, espresó’l so deséu de que la Xunta d’Escuela de Maxisteriu de la Universidá d’Uviéu apruebe mañana, martes 31 d’marzu, la propuesta pola que l’asturianu taría como Mención dientro de los planes d’estudiu del centru.

Dende la organización viense trabayando a favor d’esta decisión, apoyada pol Rector Vicente Gotor, dende va meses y entiéndese que la Mención xeneró yá un consensu importante na comunidá universitaria. La organización pide a tolos miembros de la Xunta d’Escuela que participen d’esta votación y lo faigan apoyando la decisión más afayadiza pa iguar los estudios de llingua asturiana en Maxisteriu, tanto pa los alumnos, como pal profesoráu d’esta materia.

Dende’l puntu de vista del CUPA, d’aprobase esta decisión, va dase un nuevu pasu hestóricu pal asturianu y pa la Universidá d’Uviéu.