El Conceyu d’Uviéu ufierta cursos d’impresión 3D y Modeláu

El conceyal d’Empléu presentaba esta selmana la ufierta formativa gratuita, empobinada preferentemente a paraos, sorrayando les posibilidaes llaborales qu’ufierta esti nichu de mercáu en crecedera”. El plazu d’inscripción entamó’l miércoles 19.

El Conceyu d’Uviéu, al traviés de la conceyalía d’Empléu, pon en marcha dos cursos de “Impresión 3D y Iniciación al Modeláu” de 20 hores cada unu,  coles mires d’ameyorar la empleabilidá de los paraos de llarga duración del conceyu.

La ufierta formativa foi presentada esta selmana pol conceyal d’Emplegu, Rubén Rosón, quien esplicó que les 24 places ufiertaes en total, van ser ocupaes preferentemente por persones desemplegaes, empadronaes n’Uviéu, con  formación o esperiencia previa nel diseñu gráficu, impresión o modeláu que quieran afitar les sos conocencies na tecnoloxía d’impresión 3D y llegar a conocer los sos materiales, componentes mecánicos, según el procesu d’impresión y el caltenimientu d’una imprentadora. Según sorrayó’l conceyal, con esti tipu d’ufiertes formatives “l’alministración local ta ameyorando la empleabilidá de les persones nun nichu de mercáu que tien una crecedera esponencial nun futuru inmediatu”.

L’alumnáu va adquirir conocencies básiques pa realizar modelaos propios en 3D y va ser capaz de resolver los principales retos y problemátiques que puedan surdir, según llograr una visión xeneral del abanicu de tecnoloxíes y materiales esistentes.

Dambos cursos van desenvolvese nel Centru de Formación Ocupacional de la Corredoria, n’horariu de tarde (16:00 a 20:00 hores), el primeru d’ellos celebraráse del 28 d’ochobre al 4 de noviembre y el segundu, del 7 al 11 de noviembre.  Les inscripciones podrán presentase de forma telemática o presencialmente dende esti miércoles, 19 d’ochobre hasta’l martes, 25 d’ochobre a les 14:00 hores.

Como requisitos pa optar a estos cursos gratuitos, ye necesariu ser mayor de 18 años y menor de 65, amás de tar empadronáu n’Uviéu, tar desemplegáu y tener conocencies d’informática a nivel d’usuariu. Van Tener preferencia aquelles persones que tean en posesión de titulación universitaria n’Inxeniería, Arquitectura, Belles artes, Diseñu Gráficu, y/o Formación profesional rellacionada coles titulaciones referíes, y/o Certificáu de Profesionalidá de nivel 3 de les families profesionales siguientes: Artes gráfiques, Artes y artesaníes, Edificación y obra civil, Eletricidá y electrónica, Enerxía y agua, Fabricación mecánica, Informática y comunicaciones, Instalación y caltenimientu.  Coles mesmes, van tener preferencia aquelles persones qu’acrediten una esperiencia profesional rellacionada col diseñu gráficu, la impresión o’l modeláu.