El Club Musical fina en TPA su primer temporada con DRD

L’últimu capítulu de la primer temporada del programa El Club Musical (TPA, domingu 11:30 h.) ta protagonizáu pol tríu DRD, con diez años de vida yá a recostines y un trabayu de renovación de la música tradicional asturiana bultable y novedosu. Creaos pa participar nun ciclu de conciertos tituláu Folk de cámara, deciden siguir como grupu estable y empiecen a estudiar la tradición musical asturiana y a investigar les sos posibilidaes nun llinguaxe sonoru más contemporáneu.

DRD ya foi protagonista d’otros espacios en llingua asturiana en temporaes pasáes, como asocedió cola so apaición nel espaciu “Nós”.

Con dos trabayos discográficos publicaos DRD gocia d’un gran prestixu na escena folk, mostrándose como unos grandes instrumentistes, compositores y arreglistes de los ritmos y estilos de la tradición sonora del país, de la qu’ellos tienen una conocencia fonda. Rubén Bada (buzuqui), Dolfu R. Fernández (violín y voz) y Borja Baragaño (flauta) lleven la música asturiana a una dimensión nueva, faciéndola atractiva y moderna.

Con esti capítulu llégase al final de la primer temporada d’El Club Musical (en total foron trece), per onde pasaron dellos de los grupos y intérpretes más emblemáticos del panorama musical asturianu: Blues & Decker, Lorena Álvarez y su Banda Municipal, Crudo, El Patio de tu Casa, Alexandra in Grey, Toli Morilla, Skama la Rede, Doctor Explosion, Pauline en la Playa, Patrulla Dixie, Delagua, Misiva y DRD, qu’abarquen estilos como’l rock, pop, punk, jazz, canción d’autor, indie o folk, cantaos n’asturianu, castellanu y inglés. Dende los responsables del proyectu, Goxe Producciones, manifiesten el so enfotu en que, dada la mui bona acoyida ente’l públicu y los músicos, la TPA decida siguir cola emisión d’esti espaciu nun futuru próximu. Amás d’ello, quieren agradecer a tol equipu involucráu nel programa la so profesionalidá y la disponibilidá y apoyo de la escena musical del país.