Portada Política El circulu Lliberal esixe aparar la distribución de “La Gaceta de Xixón” de xunetu

El circulu Lliberal esixe aparar la distribución de “La Gaceta de Xixón” de xunetu

by asturnet

El Círculu Lliberal, siguiendo la llínia asoleyada esti día pol Partíu Popular, tuvo accesu al númberu de xunetu de la Gaceta de Gijón, qu’edita l’Ayuntamientu de Gijón/Xixón, y que con una tirada de 120.000 exemplares va repartise peles cases del conceyu y manifiesta lleer con total sorpresa, y na portada, el titular que vien darréu:”Una ordenanza municipal regula ya el uso del asturiano”. Y na páxina 16 l’afirmación siguiente:”El Ayuntamiento aprobó la Ordenanza Municipal del Usu de la Llingua Asturiana nel ámbitu del Conceyu de Xixón”.

Y na páxina 17 lo que sigue: “L’asturianu y el castellanu son llingües propies del Conceyu de Xixón”.

Ante la gravedá de lo que s’afirma, por nun ser en nengún casu verdá, el Círculu Lliberal quier decir que: 1º N’aconceyamientu del 21 de mayu de 2008 la xunta de gobiernu municipal alcuerda, según lo afitao nel artículu 94 del Reglamento Orgánico de Funcionamiento del pleno del Ayuntamiento de Gijón/Xixón “Elevar el Proyecto de Ordenanza Municipal del Uso del Asturiano en el ámbito del concejo de Gijón/Xixón y el Plan de Normalización y Uso Lingüístico del concejo de Gijón/Xixón” y tamién “Remitir la iniciativa, el Proyecto y su documentación a la Secretaría general del Pleno para su tramitación”. 2ºEl 29 de mayu de 2008 la Secretaria General remite a los grupos municipales el Proyectu d’Ordenanza (12 artículos) y de Plan de Normalización (51 medíes). 3ºL’artículu 1 del Proyectu d’Ordenanza del equipu gobiernu diz (na redacción castellana, la única con validez llegal) lo que sigue: “El asturiano y el castellano son lenguas del concejo de Gijón/Xixón”, pero na versión n’asturianu que tamién s’acompaña diz: “L’asturianu y el castellanu son llingües propies del Conceyu de Xixón”. La inclusión d’esi “propies” na versión asturiana, que nun tien validez llegal, amuesa a les clares una intención evidente de manipulación y engañu por parte del equipu de gobiernu municipal. Al mesmu tiempu, queda claro que lo escrito na páxina 17 de la Gaceta de Gijón ye mentira. 4ºNos díes siguientes, el Grupu Municipal Popular presentó 9 enmiendes al Proyectu d’Ordenanza y una enmienda a la totalidá (un plan propiu con 118 medíes) al Plan de Normalización del equipu gobiernu. 5ºEnsin tener tovía estudiao les enmiendes presentaes, la Gaceta de Gijón anuncia, como yá diximos antes, y nel so númberu de xuliu que “yá hai una ordenanza que regula l’usu del asturianu en Xixón”, lo que ye absolutamente falso. Porque Proyectu y enmiendes han dir al Plenu del mes de xuliu. Porque después los testos resultantes han sometese a Información Público durante 30 díes. Porque tres estudiar les alegaciones que puen presentase habrá volver otra vegada al Plenu, a lo más pronto, en setiembre. Y porque tres l’aprobación en Plenu tendrá de publicase nel BOPA, y sólo entós sedría verdá l’afirmación de qu’una Ordenanza regula l’usu de la llingua nel conceyu de Xixón. Poro, y en delantre d’esti atentáu gratuitu a la verdá, d’esta antidemocrática manipulación de la realidá, EL CÍRCULU LLIBERAL ESIXE: -QUE BAXO NENGÚN CONCEPTU SE REPARTA LA GACETA DE GIJÓN ONDE SE RECUEYE ESTA MENTIRA DEL EQUIPU GOBIERNU DE PSOE Y IU SOBRE LA LLINGUA -QUE SE PARALICE DARRÉU TOLA TRAMITACIÓN DEL PROYECTU D’ORDENANZA Y PLAN DEL ASTURIANU, HASTA QUE NUN TEEN GARANTIZAOS LOS MECANISMOS AFAYAÍZOS PA ENTAMAR UN DIÁLOGU VERDADERU QUE FACILITE’L CONSENSU DE TOLOS GRUPOS MUNICIPALES NA ELLABORACIÓN DE LA ORDENANZA Y EL PLAN MENTAOS -QUE LOS CAUSANTES DE LA PUBLICACIÓN DE FALSEDÁ TALA NA GACETA DE GIJÓN ASUMAN LES SOS RESPONSABILIDAES POLITIQUES

Tamién te podria gustar