El Centru Social La Semiente celebra una “espircha” pal so sestu aniversariu

El Centru Social La Semiente, de L’Entregu, celebra una espicha pa esta fin de selmana coincidiendo col so sestu aniversariu a la que conviden a toes aquelles persones que los acompañaron en dalgún momentu mientres estos años.

La que bien pue ser l’asociación más activa de tool valle’l Nalón, cumple seis años, seis años que dieron pa enforma, realizando una montonera d’actividaes, charres, presentaciones lliteraries, de revistes, documentales, recitales poéticos, fiestes, conciertos… Conocida ye la so campaña añal de recoyida de fondos económicos y material escolar pa les families más desfavorecidas del valle.

Nesti tiempu realizaron campañes divulgatives, impartiéronse y tán impartiéndose talleres de distinta índole, celebraron amagüestos… intercambios culturales…, y too esto fecho de forma totalmente gratuita, desinteresadamente, compartiendo conocencies y habilidaes, y de forma totalmente autoxestionada, ensin subvenciones. Participaron activamente de distintes plataformes de calter social o medioambiental y tamién salieron a la cai contra les inxusticies sociales en munches movilizaciones, ya  qu’esa ye una pata fundamental d’esti colectivu. Un apueste importante nestos años, foi la d’entamar la Foguera de San Xuan en L’Entregu, y qu’anguaño  va cuntar con una programación más ambiciosa con una carpa, y un pequenu festival de música totalmente gratuitu. Precisamente, la espicha que celebren esta fin de selmana va intentar sufragar parte de los gastos de La Foguera de San Xuan, actividá que se fai ensin subvenciones de nengún tipu.

La Espicha Sestu Aniversariu de La Semiente va celebrase los díes 21, 22 y 23 d’abril, y súmase asi, al calendariu de espiches tradicionales del Valle del Nalón. Podrán tastiase  una pipa de 200 llitros de sidra de producción ecolóxico, amás de los productos típicos d’estes celebraciones, como conceyales, bígaros, tortiella, llacón, güevos cocíos… Por too ello, conviden a toes aquelles persones que los acompañaron en dalgún momentu mientres estos años a que pasen a esfrutar un poco de l’amistá, la confraternización, la bona sidra y la bona comida a lo llargo del fín de selmana. Y como non, conviden a aquelles persones que nun conozan el centru social a que pasen pellí y esfruten d’un espaciu abiertu pa tol mundu.