Portada Conceyos El Centru Nacional d’Espardimientu Musical y Uviéu presenten el X ciclu Primavera Barroca

El Centru Nacional d’Espardimientu Musical y Uviéu presenten el X ciclu Primavera Barroca

by redacción asturnews

El Centru Nacional d’Espardimientu Musical y Uviéu presentaron esti mes la décima edición del ciclu Primavera Barroca que va ufiertar 6 conciertos y va tener llugar nel Auditoriu Príncipe Felipe dende’l 21 de marzu hasta’l 31 de mayu. En paralelu a los conciertos, va celebrase un programa de conferencies, entamaes pol CNDM en collaboración col Conservatorio Cimeru de Música y l’Universidá d’Uviéu, que van cuntar cola presencia de los intérpretes del ciclu.

El Centru Nacional d’Espardimientu Musical (CNDM, unidá del INAEM, del Ministeriu de Cultura y Deporte) y la Fundación Municipal de Cultura del Conceyu d’Uviéu promueven la décima edición del ciclu Primavera Barroca, qu’avera la música d’esti periodu al públicu al traviés de delles de les agrupaciones ya intérpretes más reconocíos del panorama nacional ya internacional. Esti ciclu forma parte de los Circuitos” del CNDM, programes que s’entamen en 25 ciudaes españoles y 2 estranxeres coles mires de promover el patrimoniu musical español. Primavera Barroca va acoyer 6 conciertos ente’l 21 de marzu y el 31 de mayu de 2023 nel Auditoriu Príncipe Felipe.

Nesta décima edición, al traviés d’estraordinaries agrupaciones españoles y estranxeres, el públicu uvieín va tener la oportunidá única d’afayar ayalgues musicales que permanecíen ocultes hasta agora. En total, nueve recuperaciones históriques van ver el so estrenu en tiempos modernos nesti ciclu de la mano d’artistes de primerísimo nivel. El ciclu centra la so atención na música del Barrocu, anque esta edición tamién va más allá con propuestes que van dexar apreciar la evolución d’esi periodu escontra otros enclinos y sensibilidaes a lo llargo del tiempu.

En paralelu al ciclu, van celebrase conferencies, en collaboración col Conservatorio Superior de Música y l’Universidá d’Uviéu, que van cuntar cola presencia de los intérpretes p’afondar na programación, averar estes músiques a los mozos y arriquecer la esperiencia d’escucha.

El presidente de la Fundación Municipal de Culura, José Luis Costillas, señaló que “Uviéu lleva diez años acoyendo esti ciclu qu’ufierta a tolos uvieinos la oportunidá de conocer músiques ocultes del Barrocu y d’esquizar corrientes artístiques menos conocíes pol gran públicu”.

Más información

Tamién te podria gustar