Portada Conceyos Avilés entama un programa pa Formación Profesional con actividaes d’acción comuñal

Avilés entama un programa pa Formación Profesional con actividaes d’acción comuñal

by redacción asturnews

Dende’l serviciu de Mocedá d’Avilés púnxose hai poco en marcha un nuevu programa d’aprendizaxe-serviciu (APS) empobináu al alumnáu de Formación Profesional. Tratase d’un enfoque pedagóxicu nel que los alumnos aprienden al empar que realicen actividaes d’acción comuñal en cualquier llugar onde se tenga una necesidá.

La conceyala de Mocedá, Raquel Ruiz, axuntóse esta selmana pasada coles direcciones del CIFP d’Avilés, CIFP del Deporte, IES Carreño Miranda, IES La Madalena, IES Nº5 y IES Menéndez Pidal, que disponen de módulos de Formación Profesional tantu de grau básicu, mediu o superior, pa empecipiar una collaboración col nuevu programa APS.

Esti enfoque educativu fomenta l’aprendizaxe activu al traviés de la participación del alumnáu n’actividaes d’acción comuñal, dexando conectar lo qu’aprienden na aula con un contestu real y de forma vivencial; yá sía nuna comunidá, asociación, o nel so propiu centru educativu. Ruiz destacó la importancia de treslladar les conocencies adquiríes pol alumnáu de FP mientres tol añu a acciones concretes: “agora mesmu tánse llevando a cabo módulo rellacionaos col deporte, con integración social o con peluquería que pueden realizar dalgún trabayu intergeneracional con persones mayores”.

En realizando’l diagnósticu nel marcu de la Rede de Ciudaes amigables coles persones mayores’, van plantegase proyectos d’aprendizaxe-serviciu que sían beneficiosos tantu pal alumnáu de los ciclos de Formación Profesional d’Avilés como pa les persones mayores de 60 años.

L’aprendizaxe-serviciu apurre una práctica de los valores de ciudadanía, potencia l’intercambiu horizontal de conocencies, refuerza’l sentíu de pertenencia, refuerza la coherencia educativa, da respuesta a necesidaes reales, crea redes y ameyora la cohesión social, amonta’l capital social de la población y aguiya la corresponsabilidad de los axentes educativos y sociales.

Tamién te podria gustar