El Campu San Francisco acueye esti vienres la II Feria de l’Actividá Física

El conceyal de Deporte, Fernando Villacampa, presentó esta mañana al pie de Sergio Palaciu, responsable de l’Asociación Partycipa y Raúl López, representante de Disc-Golf  Club Uviéu, la segunda edición  de la Feria de l’Actividá Física, que’l so oxetivu principal ye dar a conocer les actividaes y recursos deportivos colos que cunta’l conceyu.  L’añu pasáu, más de 500 persones participaron na primer edición d’esta cita.

Na cita, que se va desenvolver de 16:00 a 21:00 hores, van dar a conocer 33 actividaes y los recursos deportivos de los que puede esfrutase nel conceyu. Nesta ocasión, l’escenariu va ser  el Campu San Francisco,   nel que, de 16:00 a 21:00 hores, van promocionase un total de 33 disciplines distintes, que van dende les más conocíes como’l fútbol, la danza, el patinaxe de velocidá, el karate, el tiru olímpicu o los bolos, hasta les  actividaes más desconocíes como’l shorinji kempo.

Según resaltó’l conceyal, “cualquier inversión nel deporte, ye un apueste seguru pol futuru, yá que torna en forma de salú, tantu física como mental”. Por ello, unu de los responsables de la organización de la Feria, convidó a “tolos uvieinos a participar, a conocer toles disciplines” que se van esponer nel  parque, “y quién sabe, a que se engabitar a dalguna d’elles”. Pela so parte, Raúl López, estimó la organización d’esta cita, “una idea fantástica, tantu por dar a conocer les diverses actividaes físiques que s’ufierten n’Uviéu, como por ser un puntu d’alcuentru pa la xente dedicada al deporte, pa conocenos y collaborar ente nós”.

Un total de 33 entidaes van allegase al parque esti vienres pa dar a conocer la so actividá, va haber clubes, escuela y entidaes, pero tamién otres agrupaciones informales, como ‘Muyer y Deporte 40′, formáu por muyeres que queden pa faer deporte en grupu. Amás de probar distintes actividaes deportives, les persones que s’animen a participar nesta feria, van poder esfrutar dende les 17:00 hores, d’exhibiciones  de diverses actividaes físiques como ximnasia rítmica, parkour freerunning, patinaxe artísticu, fitness infantil o runfa, nun escenariu instaláu nel Escorialín. La xornada va rematar cola actuación de Batucada Naranco.