El 39% de los Erasmus quier quedase a trabayar n’España

El 39% de los Erasmus que decide estudiar n’España quier quedase a trabayar, frente a un 30% que prefier tornar a la so ciudá d’orixe p’atopar el so futuru llaboral, según una encuesta realizada por ESN Spain y Uniplaces.es.

L’informe tamién destaca que Madrid, Barcelona y Valencia son les ciudaes nes que los mozos estranxeros ven más posibilidaes d’atopar un trabayu. Amás, el 28% de los consultaos piensa que va ser capaz d’atopar un empléu n’España rellacionáu cola carrera qu’estudiaron.

Sía que non, el 44% de los erasmus afirma que nun buscó trabayu n’España porque consideren que “nun ye fácil”. Ello ye que otru 24% afirma que buscó empléu y nun atopó nada, y namá hai un 6% de los erasmus que llogró atopar trabayu, según la encuesta.
Sicasí, un 27% de los consultaos piensa que los mozos españoles tán sobrecualificaos p’aportar al mercáu llaboral, cuidando que los empleos n’España son “de baxa calidá y tán mal pagos”. Amás, creen que n’España hai demasiaos universitarios en comparanza con otros países de la Unión Europea.

Al respective de les mires salariales que contemplen los mozos erasmus nun son elevaes yá que el 43% cree que’l sueldu del so primer emplegu al salir de la Universidá va ser ente los 10.000 y los 15.000 euros al añu. Según el INE, el salariu más frecuente n’España ronda los 16.500 euros brutos al añu.